Ամանորի եւ Սբ. Ծնունդի տօներուն առիթով, հիւրաբար Լիբանան գտնուողª քուէյթահայ ազգային բարերար, գործարար, հասարակական գործիչ եւ ՙՄՏԿԿ ասպետ՚-ի շքանշանակիր տիար Կիրակոս Գույումճեան Երեքշաբթի, 2 Յունուար 2024-ին, այցելեց ՙԱրարատ՚-ի խմբագրատուն, ընկերակցութեամբ իր որդւոյն:
Յարգելի հիւրը ՙԱրարատ՚-ի տնօրէնուհի Անի Եփրեմեանին նուիրեց արաբերէնով նորատիպ հրատարակուած ՙԵՐԹՍ ԵՐԿԱԹԻՆ ՀԵՏ՚ իր վերջին գիրքը:
Պրն. Գույումճեան, Քուէյթի մէջ կազմակերպուած գիրքերու ցուցահանդէսինª Նոյեմբեր ամսուան ընթացքին, իր մասնակցութիւնը բերած էր վերոնշեալ գիրքով, ուր հեղինակը արժանացաւ բոլոր ներկաներու գնահատանքինª իր ունեցած տարիներու վաստակով:
Հանդիպումը առիթ եղաւ նաեւ քննարկելու Սփիւռքի դժուարին պայմանները ընդհանրապէս եւ Լիբանանի ծանր տագնապները մասնաւորապէս:
Ան մեծապէս գնահատեց կառոյցներու պատասխանատուներուն տարած նուիրեալ աշխատանքը, նշելով որ իրեն համար կարեւորագոյնները կը նկատուին հայ մամուլը եւ հայ դպրոցը:
Ամանորի եւ Սբ. Ծնունդի տօներուն առիթով, ան շնորհաւորեց ՙԱրարատ՚-ի տնօրէնութիւնն ու խմբագրական կազմը, մաղթելով առողջութիւն եւ յաջողութիւն:
