Հովանաւորութեամբ Ն.Ս.Օ.Տ.Տ. Արամ Ա. Վեհափառ Հայրապետին եւ կազմակերպութեամբ Կաթողիկոսարանի Քրիստոնէական Դաստիարակութեան բաժանմունքին ու Լիբանանի Հայոց Թեմի Կիրակնօրեայ վարժարաններուն, Շաբաթ, 2 Դեկտեմբեր 2023-ի առաւօտեան ժամը 9:30-ին, Անթիլիասի Մայրավանքի Ս. Գրիգոր Լուսաւորիչ Մայր Տաճարին մէջ մատուցուեցաւ Ս. եւ Անմահ Պատարագ:
Աւանդութիւն դարձած է, որ մեր եկեղեցւոյ լուսաւորիչներուն` Ս. Թադէոս եւ Ս. Բարթողիմէոս առաքեալներու տօնին առիթով, Լիբանանի Հայոց Թեմի կիրակնօրեայ վարժարանները, իրենց ուսուցչական կազմով ու աշակերտութեամբ, միախմբուին Անթիլիասի Մայրավանք` նշելու նաեւ ՙԿիրակնօրեայի Օր՚ը:
Արդարեւ, Ս. Պատարագը մատուցեց Քրիստոնէական Դաստիարակութեան բաժանմունքի վարիչ Գերպ. Տ. Ստեփանոս Ծ. Վրդ. Փաշայեանը, իսկ Ս. Պատարագի երգեցողութիւնը կատարեց Կաթողիկոսարանի ՙՆարեկացի՚ մանկապատանեկան երգչախումբը, ղեկավարութեամբ Հոգշ. Տ. Զաւէն Վրդ. Նաճարեանի: Ս. Սեղանին սպասարկեցին Ճիւնիի Ս. Յարութիւն եկեղեցւոյ սարկաւագներն ու դպիրները: Ս. Պատարագի աւարտին, կիրակնօրեայ վարժարաններու մեծ ընտանիքը, գլխաւորութեամբ պատասխանատու հայր սուրբին եւ Արժ. Տ. Սարգիս Ա. Քհնյ. Սարգիսեանին ու Ժանին Դանիէլեան-Մարգարեանին, բարձրացաւ Վեհարան, ուր Մայրավանքի կիրակնօրեայի ուսուցիչ Արին Մարգարեանը բացման խօսքով հանդէս եկաւ: Ապա, իւրաքանչիւր շրջանի կիրակնօրեայ ներկայացուց կոկիկ յայտագիր մը` սաղմոսասացութեամբ եւ շարականի երգեցողութեամբ:
Հուսկ, Նորին Սրբութիւնը յայտնեց իր բարձր գնահատանքն եւ իր հայրական օրհնութիւնը բաշխեց մանուկներուն: Ան իր ուրախութիւնը յայտնեց Մայրավանքէն ներս խումբ մը փոքրիկներու ներկայութեան գեղեցիկ տեսարանին, ուր անոնք ամէն Կիրակի կը հաւաքուին եւ Աստուծոյ խօսքը ստանալով, առաւել եւս հոգեւոր սնունդով կը լիցքաւորուին: Ի վերջոյ, Մայրավանքի պարտէզին մէջ, Լիբանանի թեմի կիրակնօրեայ վարժարաններու պատասխանատուները եւ խումբ մը փոքրիկներ տնկեցին մշտադալար ծառ մը, որպէս խորհրդանիշ իրենց հաւատքի արմատաւորման:
