Լիբանանի հարաւային սահմանային գօտին երէկ եւս ականատես դարձաւ իսրայէլեան հարուածներու եւ Լիբանանէն հրթիռարձակումներու: ՙԱլ-Ժազիրա՚ լրատուական ցանցը հաղորդեց, որ երէկ հարաւային Լիբանանէն աւելի քան քսան հրթիռ արձակուած է իսրայէլեան բնակավայրերուն ուղղութեամբ: Իսրայէլեան բանակի բանբեր Աւիխայ Ատրահի յայտնեց, որ Լիբանանէն արձակուած հրասանդներու պայթումէն Շթուլա բնակավայրի դիրքերուն վրայ թեթեւօրէն վիրաւորուած է երեք զինուոր:
Համաս շարժումի լիբանանեան մասնաճիւղը երէկ յայտարարեց Լիբանանի մէջ պաղեստինցիներ զինուորագրելու մասին` որպէս նախապատրաստութիւն ՙԵրուսաղէմի եւ Աքսայի ազատագրութեան եւ պաղեստինեան ապագայի կերտումին՚:
Միւս կողմէ, իսրայէլեան հրետանին, ռազմական օդանաւերն ու անօդաչու սարքերը անդադար ռմբակոծեցին Լիբանանի հարաւային գօտին` հասնելով մինչեւ Պընթ Ժպէյլ քաղաքի հիւսիսային հատուածը:
