Ամառնային յաջող բանակումէն ու սեպտեմբերեան արձակուրդէն ետք, ՀԲԸՄ-ՀԵԸ Անդրանիկ Սեւանի սկաուտական շարժումի արիներն ու անոնց միացած նորեկ անդամները Շաբաթ, 14 Հոկտեմբեր 2023-ին, վերադարձան ակումբª ՀԲԸՄ-ի Համայնքային կեդրոն (Նազարեան-Զապէլ Մովսէսեան համալիր), որուն շրջափակին մէջ տեղի ունեցաւ սկաուտական շարժումի 2023-2024 տարեշրջանի բացումը:
Արարողութեան պաշտօնական հատուածէն առաջ, սկաուտական բոլոր խմբակները կազմակերպեցին հաւաքներ, որոնց ընթացքին շնորհուեցան անցնող տարեշրջանի եւ ամառնային բանակումի ընթացքին արիներուն վաստակած շքանշանները:
Հիւրերու ժամանումէն ետք, ՀԲԸՄ-ՀԵԸ ՙԱնդրանիկ՚ փողերախումբին առաջնորդութեամբ սկսաւ սկաուտական բոլոր խումբերուն հանդիսաւոր մուտքըª գլխաւորութեամբ ընդհանոր խմբապետ Ժիրայր Թոսունեանի: Դրօշակի արարողութենէն եւ քայլերգներէն ետք, Ռըմէյլի Սուրբ Յարութիւն եկեղեցւոյ հոգեւոր հովիւ Տէր Ղէւոնդ Քհնյ. Լոշխաճեան օրհնեց սկաուտներուն վերամուտը, մաղթելով որ անոնք բոլորեն սկաուտական բարեյաջող եւ արդիւնաւէտ տարեշրջան մը:
Ընդհանուր խմբապետ Ժիրայր Թոսունեան իր խօսքին մէջ վստահութիւն յայտնեց, որ ՀԵԸ Անդրանիկ Սեւանի սկաուտական շարժումի ղեկավարութեան թափած ջանքերը արդիւնաւէտ են ու դրական ազդեցութիւն կ’ունենան բոլոր անդամներու անհատական եւ հաւաքական կեանքին վրայ: Շատ յաջող որակելով անցնող տարեշրջանն ու ամառնային ՙՍկաուտին ճանապարհը՚ խորագրեալ բանակումը, Թոսունեան շնորհակալութիւն յայտնեց առնչակից բոլոր վարչութիւններուն եւ ծնողներուն, որոնք միշտ աջակցեցան խումբի գործունէութեանց: ՙԻրար հետ, ձեռք-ձեռքի տալով մենք աւելի պիտի զօրանանք՚, ըսաւ Թոսունեան եւ յայտնեց, թէ նոր տարեշրջանի գլխաւոր թեման է ՙՍկաուտը բնութեան մէջ՚, խոստանալով բացառիկ աշխատանք տանիլª նոյնիսկ գերազանցելու անցեալ տարեշրջանի յաջողութիւնը:
ՀԵԸ Անդրանիկ Սեւանի Գործադիր մարմինի ատենապետ եւ միութեան Կեդրոնական վարչութեան անդամ Նշան Ղորղորեան ուրախութիւն եւ գոհունակութիւն յայտնեց բազմաբնոյթ գործունէութեամբ յատկանշուած անցնող տարեշրջանին համար, մաղթելով որ 2023-2024-ը եւս ըլլայ ապահով եւ արդիւնաւէտ:
ՀԲԸՄ-ՀԵԸ Կեդրոնական վարչութեան ատենապետ Վիգէն Չերչեան ողջունեց շարժումի բոլոր անդամներըª կրտսերագոյն թիթեռէն երեցագոյն խմբապետը, եւ ըսաւ. ՙՄեր միութեան հիմնադրութենէն մինչեւ օրս, սկաուտական շարժումը կը համարուի անոր կարեւորագոյն թեւերէն մէկը, առանց որուն պիտի դժուարանար մեր թռիչքըª բարձունքն ի վեր: Ի տես ՀԵԸ-ի սկաուտութեան երիտասարդ դիմագիծին, ծառայասիրութեան, հայրենասիրութեան եւ դաւանած մարդկային վեհ սկզբունքներուն, միութեան ղեկավարութիւնը միշտ զգալի կարեւորութիւն տուած է սկաուտութեան եւ առաւելագոյն ջանք ներդրածª զայն զարգացնելու ուղղութեամբ՚: Չերչեան նաեւ յայտնեց, որ ՀԵԸ Անդրանիկ Սեւանի Գործադիր մարմինին ու Սկաուտական վարչութեան առաջարկով եւ Կեդրոնական վարչութեան որոշումով Ժիրայր Թոսունեան նշանակուած է ՀԵԸ Անդրանիկ Սեւանի սկաուտական շարժումի ընդհանուր խմբապետ ու պատասխանատուª ակումբին մէջ ՙScouts Du Liban՚-ի եւ ՙAssociation des Eclaireuses Du Liban՚-ի բոլոր խմբապետ-խմբապետուհիներուն ու անոնց գործունէութեանց:
Ապա, շքանշաններ յանձնուեցան բանակումի տիպար սկաուտին, շտապ օգնութեան ոլորտին մէջ փայլած սկաուտին, ինչպէս նաեւ ընկերային հաղորդակցութեանց հարթակներով զբաղող յանձնախումբի անդամներուն, իսկ ՀԵԸ Անդրանիկ Սեւանի Սկաուտական եւ Ընկերային վարչութիւնները մատուցեցին անակնկալ մըª գերազանց յաջողութեան շքանշան շնորհելով խմբապետական կազմի անդամներուն, երէցներուն եւ քարավելներուն:
Տեղի ունեցան խմբապետական փոխանցումներ ե նշանակումներ, իսկ իրենց ողջոյնի խօսքերը արտասանեցին նաեւ ՙScouts Du Liban՚ Պէյրութ-1 շրջանի յանձնակատար Սամ Շամունը եւ ՙAssociation des Eclaireuses Du Liban՚-ի ատենապետ, յանձնակատար Նատին Աշշին, որոնք գնահատեցին ՀԵԸ Անդրանիկ Սեւանի սկաուտական շարժումին գործունէութիւնը, առաջարկեցին իրենց մնայուն աջակցութիւնը եւ յաջողութիւն մաղթեցին նոր տարեշրջանին համար:
Սկաուտական տարեշրջանի բացման պաշտօնական արարողութեան աւարտին, ակումբին մէջ տեղի ունեցաւ ընթրիքի աւանդական հաւաքոյթª ի պատիւ անցնող տարեշրջանի բարձրագոյն խմբակի անդամներուն եւ վարչական պատասխանատուներուն: Այս տարուան հաւաքոյթը աւելի յատկանշական դարձաւ ներկայութեամբ ՀԵԸ Կեդրոնական վարչութեան անդամներէն Յակոբ Ճըղըլեանին, Լիսա Ճերեճեանին եւ Յակոբ Տանձիկեանին: Ընթրիքին բոլոր ներկաները միասնաբար հատեցին կարկանդակը եւ արտասանեցին ՀԵԸ Անդրանիկ Սեւանի սկաուտներուն արդիւնաւէտ տարեշրջան վայելելու բարեմաղթանքներ:
Նոր տարեշրջանի փառաւոր բացումէն ետք, ՀԵԸ Անդրանիկ Սեւանի սկաուտական շարժումը այժմ լծուած է իր 2023-2024 տարեշրջանի հետաքրքրական եւ բազմաբնոյթ ծրագրի գործադրութեան:
ՀԵԸ-ի մամլոյ եւ տեղեկատուական գրասենեակ
