Երէկ իսրայէլեան ուժեր թիրախ դարձուցին լիբանանեան սահմանին վրայ գտնուող տարբեր լրատու գործակալութիւններու թղթակիցներ: Ռմբակոծումին պատճառով զոհուեցաւ ամերիկեան ՙՌոյթըրզ՚ լրատու գործակալութեան լուսանկարիչ Իսամ Ապտալլա: Թղթակիցները կը գտնուէին լիբանանեան Ալմա Ալ Շաապ գիւղին մօտ: ՙԱլ Ժազիրա՚ պատկերասփիւռի կայանէն Գարմէն Ճոխատար եւ Էլի Պրախիա: Աւելի առաջ խումբ մը զինեալներ փորձած էին նոյն շրջանէն թափանցել հիւսիսային Պաղեստին, սակայն ենթարկուելով իսրայէլեան ուժերու հակադարձութեան, հեռացած էին շրջանէն:
Որպէս հակադարձութիւն իսրայէլեան ուժերու կողմէ կատարուած ռմբակոծումին հարաւային լիբանանի կարգ մը գիւղերու վրայ, Հըզպալլայի ուժեր թիրախ դարձուցին իսրայէլեան բանակի միաւորներ Ալ Ապպատ, Միսքաֆհամ, Ռամիա եւ Ժալ Ալ Ալլամ դիրքերուն մէջ, արձանագրելով մահացու հարուածներ: Ապա իսրայէլեան անօդաչու թռչող սարք մը ռմբակոծեց Հըզպալլայի պատկանող դիրք մը:
