Մոսկուայի 876-ամեակին առթիւ Երեւանի եւ ՀՀ մարզերուն մէջ պիտի կազմակերպուին շարք մը միջոցառումներ: Այս մասին ըսաւ ՙՄոսկուայի Տուն՚ մշակութային գործարար կեդրոնի գլխաւոր տնօրէն Վահրամ Կարապետեանը: Մայրաքաղաքին եւ մարզերուն մէջ միջոցառումները պիտի կազմակերպէ ՙՄոսկուայի Տուն՚ կեդրոնը:
ՙԱռաջին միջոցառումը տեղի պիտի ունենայ 31 Օգոստոսին: ՙԿազփրոմ՚ի դպրոցին մէջ պիտի բանանք Մոսկուայի անկիւնը: Այնտեղ պիտի ներկայացուին գիրքեր Մոսկուայի պատմութեան վերաբերեալ եւ պիտի ունենան թեմատիկ խորագրեր` մարզական Մոսկուա, թատերական Մոսկուա, ֆիլմի Մոսկուա: Նման միջոցառման փորձ ունինք, որովհետեւ անցեալ տարի կազմակերպեցինք Կապանի եւ Երեւանի Փուշքինի անուան դպրոցին մէջ՚, նշեց Կարապետեանը:
Անոր փոխանցմամբ` յաջորդ միջոցառումը տեղի պիտի ունենայ 2 Սեպտեմբերին` ՙՄոսկուայի Տուն՚ կեդրոնին մէջ, ուր ռուսական աշխարհագրական միութեան հետ համատեղ պիտի բացուի Մոսկուային նուիրուած ՙԱմենագեղեցիկ քաղաքը՚ խորագրով լուսանկարչական աշխատանքներու ցուցահանդէսը: Այցելուները կրնան տեսնել Ռուսաստանի մայրաքաղաքի ամենագեղեցիկ ու տեսարժան վայրերը, պատմամշակութային կոթողներն ու յուշարձանները, կրնան պատկերացում կազմել ինչպէս 16-րդ դարի Մոսկուայի, այնպէս ալ մեր օրերուն աշխուժօրէն զարգացող մեկափոլիսի մասին: Նոյն օրը Հայաստանի շախմատի ակադեմիային մէջ տեղի պիտի ունենայ արդէն աւանդական դարձած շախմատի կայծակնային 4-րդ մրցաշարքը` նուիրուած Մոսկուայի օրուան:
ՙՆախատեսած ենք եւս մէկ հետաքրք ականմիջոցառում, որ տեղի պիտի ունենայ Իսահակեանի անուան գրադարանին մէջ: Այնտեղ այցելուներու ուշադրութեան պիտի ներկայացուի Մոսկուայի մասին պատմող փաստավաւերագրական ֆիլմ, ինչպէս նաեւ պիտի բացուի գիրքերու ցուցահանդէս՚, տեղեկացուց Կարապետեանը:
Նախապէս ծրագրուած միջոցառումներու ծիրին մէջ, 9 Սեպտեմբերին Հայաստանի շաշկիի ֆետերասիոնին մէջ տեղի պիտի ունենայ ռուսական շաշկիի (Checkers) ամէնամեայ (թիւով չորրորդ) մրցաշարքը` նուիրուած Մոսկուայի օրուան, որուն պիտի մասնակցին նաեւ 12-18 տարեկան մարզասէրները: Կարապետեանի պնդմամբ` մրցաշարքին հանդէպ հետաքրքրութիւնը տարուէ տարի կը մեծնայ եւ այդ մասին կը վկայէ նաեւ մասնակիցներուն քանակական աճը:
ՙՄարզական միջոցառումներու ծիրին մէջ, 10 Սեպտեմբերին Երեւանի գեղասահքի եւ հոքիի մարզադպրոցին մէջ տեղի պիտի ունենայ սառցէ ներկայացում, որուն ընթացքին ցուցադրական համարներով պիտի ներկայանան դպրոցի սաները: Անոնք անհամբեր եւ մեծ ոգեւորութեամբ կը սպասեն այդ միջոցառման, աշխուժօրէն կը պատրաստուին՚, ըսաւ բանախօսը:
Կարապետեան տեղեկացուց, որ 14 Սեպտեմբերին Երեւանի Արաբկիրի համալիր մարզաձեւերու մանկապատանեկան ՙՏիւշես՚ մարզադպրոցին մէջ տեղի պիտի ունենայ արդէն ամէնամեայ դարձած սուսերամարտի առաջնութիւնը, ուր պատանիները պիտի մրցին չորս մրցաձեւի մէջ: Ան յիշեցուց, որ նախորդ տարի կազմակերպուած միջոցառման հրաւիրուած էր ողիմպիական ախոյեան Եանա Եկորեանը: Անոր ներկայութիւնը ոգեւորած էր պատանի մարզիկները եւ առանձին շուք հաղորդած էր միջոցառման:
Մոսկուայի 876-ամեակի միջոցառումները բնականաբար չեն շրջանցած Հայաստանի մարզերը: Մասնաւորապէս` Արմավիրի ռուսական կեդրոնին մէջ տեղի պիտի ունենայ գրադարանավարներու վերապատրաստման դասընթացքներու մեկնարկը: Երեւանի մէջ ՙՄոսկուայի Տուն՚ կեդրոնը Հայաստանի Ազգային գրադարանին հետ սկսած է մասշտաբային ծրագիր, որուն ընթացքին ՀՀ մարզերու գրադարանավարները պիտի մասնակցին վերապատրասման դասընթացքներու: Ծրագիրը տեղի կ’ունենայ ԿԳՄՄ նախարարութեան աջակցութեամբ: Նոյն օրը Արմավիրի մշակոյթի տան մէջ տեղի պիտի ունենայ Հայաստանի 6 մարզերու (Արարատ, Արագածոտն, Արմավիր, Վայոց ձոր, Շիրակ եւ Կոտայք) ստեղծագործական համոյթներու ներկայացումները: Կարապետեանի գնահատմամբ` միջոցառումը աննախադէպ է, քանի որ կը ստեղծուի մշակութային երկխօսութիւն ՀՀ մարզերուն միջեւ:
ՙՄոսկուայի տարեդարձին նուիրուած միջոցառումները պիտի ամփոփուին Առնօ Բաբաջանեանի անուան համերգասրահին մէջ, ուր 17 Սեպտեմբերին կայանալիք երաժշտական երեկոյի ընթացքին առասպեթական ճազ նուագող Լեւոն Մալխասեանը պիտի կատարէ Արամ Խաչատրեանի ճազային ստեղծագործութիւնները: Համերգասրահի ցուցասրահին մէջ պիտի բացուի նաեւ նկարներու ցուցահանդէս, ուր պիտի ներկայացուին Արամ Խաչատրեանի լուսանկարները տարբեր հիւրախաղերէ: Այս տարի Երեւանի մէջ ՙՄոսկուայի Տուն՚ կեդրոնը մշակութային մեծ ծրագրով նշած է աշխարհահռչակ երաժշտահանին 120-ամեակը՚, ըսաւ Կարապետեան:
Մոսկուայի օրուան առթիւ Կապանի մէջ պիտի բացուի նաեւ ռուսական կեդրոն:
