Ծոցի արաբական երկիրները կը շարունակեն հաղորդագրութիւններով իրենց քաղաքայիններուն յորդորել, որ չճամբորդեն Լիբանան եւ այստեղ գտնուելու պարագային հեռանալ ապահովական անկայունութեան ականատես դարձող շրջաններէն: Արաբական Միացեալ Էմիրութիւններու Արտաքին գործերու նախարարութիւնը երէկ իր քաղաքայիններուն կոչ ուղղեց գործադրելու Լիբանան չճամբորդելու մասին նախապէս հրապարակուած որոշումը, առանց բացայայտելու անոր դրդապատճառները: Լիբանանի մէջ Օմանի դեսպանութիւնը երկրի քաղաքայիններուն կոչ ուղղեց ուշադրութեամբ շրջագայելու եւ գործադրելու ապահովական ցուցմունքները, հեռու մնալով զինեալ բախումներու ականատես դարձող շրջաններէն: Նմանօրինակ յայտարարութիւն մը հրապարակեց Տոհա եւ քաթարցիներէն պահանջեց անհրաժեշտութեան պարագային կապ հաստատել լիբանանեան առնչակից կառոյցներուն հետ: Սուրիոյ մէջ Պահրէյնի դեսպանութիւնը Լիբանան գտնուող պահրէյնցիներուն զգուշացուց վտանգաւոր շրջաններ այցելելէ, յորդորելով շուտով հեռանալ լիբանանեան հողերէն: Իսկ Լիբանանի մէջ Գերմանիոյ դեսպանութիւնը հերքեց, որ գերմանացիներուն կոչ ուղղած է հեռանալու Լիբանանէն:
Նշենք, որ Ծոցի արաբական երկիրներու նշեալ զգուշացումները հրապարակուեցան Այն Հըլուէի բախումներուն եւ տնտեսութեան նախարարի պաշտօնակատար Ամին Սալամի անտեղի յայտարարութիւններու լոյսին տակ: Նշենք, որ Սալամ առաջարկած էր, որ Քուէյթ կառուցէ Պէյրութի նաւահանգիստի ցորենի գուփերը, պնդելով որ այդ կարելի է իրագործել ՙգրիչի մէկ հարուածով՚: Նշեալ յայտարարութիւնը զայրոյթ յառաջացուց Ծոցի երկիրներուն, նաեւ Լիբանանի մէջ, ուր շատեր Սալամի յայտարարութիւնը համարեցին միջամտութիւն Քուէյթի որոշումներուն: Իսկ Սալամ պնդեց, որ իր նպատակը եղբայրական երկիր մը վիրաւորելը չէր, աւելցնելով որ Քուէյթ միշտ կանգնած է Լիբանանի կողքին: ՙՉէի ուզեր դիւանագիտական ճգնաժամ պատճառել Քուէյթի հետ, ոչ ալ միջամուխ դառնալ անոր ներքին հարցերուն՚, ըսսւ Սալամª պարզաբանելով, որ ինք պարզապէս ըսած էր որ ծրագիրը կարելի է:
Վարչապետի պաշտօնակատար Նեժիպ Միքաթի փորձեց մեղմել Ծոցի զայրոյթը եւ հաւաստիացուց, որ Լիբանան կը յարգէ այլ երկիրներու ներքին հարցերուն միջամուխ չդառնալու սկզբունքը: ՙՔուէյթ միշտ օգնութեան ձեռք մեկնած է մեզի՚, ըսաւ Միքաթի ու վերահաստատեց Պէյրութ-Քուէյթ յարաբերութիւններուն ջերմութիւնը:
