Հայաստանի արտաքին գործերու նախարար Արարատ Միրզոյեան ԵԱՀԿ-ի ժողովին առջեւ կատարեց յայտարարութիւն մը Արցախի հարցին վերաբերեալ: Այս ժողովը տեղի կ’ունենայ Հայաստանի պահանջով: Միրզոյեան յայտարարեց, թէ Հայաստանի հանրապետութիւնը պատրաստ է ընդունելու Ատրպէյճանի հողային ամբողջականութիւնը, այսինքնª 86.600 քառակուսի քիլոմեթր տարածութեամբ:
Միրզոյեան յայտարարեց, թէ տակաւին կը շարունակուի Արցախի շրջափակումը փակուած պահելով Լաչինի միջանցքը: Ան յիշեցուց 22 Փետրուարին Միջազգային արդարադատութեան դատարանին առած որոշումըª բանալու Լաչինի միջանցքը, որ չգործադրուեցաւ: Հակառակ որոշումին, Ատրպէյճան գնաց աւելի առաջ եւ շարունակեց իր ապօրինի քաղաքականութիւնը անցակէտ հաստատելով միջանցքին վրայ:
Նախարարը աւելցուց, որ Արցախի մարդասիրական վիճակը սկսած է դառնալ վտանգաւոր ուժանիւթի եւ պարէնի տագնապալի վիճակին պատճառով: Բնական կազի մատակարարումը նաեւ տագնապալի վիճակի մէջ է: Ատրպէյճան նաեւ կ’արգիլէ գիւղատնտեսական աշխատանքի կատարումը: Ուրեմն, Արցախի ժողովուրդին կը սպառնայ սով: Միրզոյեան յայտարարեց, թէ ձեռնածալ պիտի չմնան այս վիճակի շարունակութեան դիմաց: Ան Ատրպէյճանի վարած քաղաքականութիւնը որակեց անմարդկային:
