Քանի մը շաբաթ առաջ Լիբանանի բարձրագոյն գագաթ Քըրնէթ Սաուտայի շրջանին մէջ տեղի ունեցած արիւնալի միջադէպին յաջորդած յայտարարութիւններուն եւ հետաքննութիւններուն լոյսին տակ, Տընիէ-Մընիէ գաւառի ներկայի ու անցեալի երեսփոխանները հաղորդագրութեամբ մը յայտարարեցին, թէ Պըշարրի գաւառէն երիտասարդներու հետ տեղի ունեցած խնդիրին պատճառը հողային պահանջը չէ, որովհետեւ երկու գաւառներու սահմանագծումը եղած է տարիներ առաջ, այլ պարզապէս ջուրի եւ արօտավայրերու վերաբերող տարակարծութիւն է: Հաղորդագրութիւնը կոչ ուղղեց խնդիրը չվերագրելու յարանուանական հարցերու եւ զերծ մնալու հարեւան երկու գաւառներու բնակչութեան բարիդրացիական յարաբերութիւնները հակասող եւ իրավիճակը սրող հաղորդագրութիւններէ, այլ հարցին լուծումը վստահելու ապահովական ու դատական առնչակից մարմիններուն:
