Լիբանանցիներուն համար անհասկնալի պատճառներով, ամերիկեան տոլարին փոխարժէքը անցնող երկու օրերուն ականատես դարձաւ անակնկալ մեծ ցնցումներու, հակառակ ոչ-աշխատանքային օրեր ըլլալուն: Շաբաթ օր նոյնիսկ հարիւր հազար լիրայի բարձրանալէ ետք վերստին նուազելու կողքին, երէկ կրկնուեցաւ գրեթէ նոյն դրութիւնը եւ տոլարին շուկայի փոխարժէքը հատեց 96 հազարի սահմանը: Ելեւմտական մասնագէտներէն ոմանք կարծիք յայտնեցին, որ տեղի ունեցածին պատճառը քաղաքայիններու մտավախութիւնն է ՙՍայրաֆա՚ հարթակի աշխատանքին առնչութեամբ, մինչ ուրիշներ պնդեցին, որ ծառայութիւններու մեծ ընկերութիւն մը կառավարութենէն ստացած է լիբանանեան լիրայով վճարում, ապա տոլար գնած է շուկայէն, ստեղծելով որոշ ցնցում: Երէկ երեկոյեան, Կեդրոնական դրամատան կառավարիչ Ռիատ Սալամէ հաղորդագրութեամբ մը հաւաստիացուց, որ ՙՍայրաֆա՚-ն կը շարունակէ գործել ըստ 2023-ի Մարտին յայտարարուած կարգերուն: Այս յայտարարութենէն անմիջապէս ետք տոլարին փոխարժէքը վերստին նուազելով վերադարձաւ իր նախկին, արդէն սովորական դարձած վիճակին:
