Իսրայէլեան բանակը յայտարարեց, որ պաշտօնապէս աւարտած է պաղեստինեան Ժընին գաղթակայանին մէջ գործադրած զինուորական յարձակումը, որ տեւած էր շուրջ 48 ժամ: Ըստ բանակի բանբեր Աւիխայ Ատրահիին, իսրայէլեան ուժերը Ժընինի մէջ հարցաքննսծ են հարիւրաւոր կասկածելիներ, որմէ ետք իսրայէլացիները դուրս եկած են քաղաքէն ու անոր գաղթակայանէն: Ըստ իսրայէլեան կողմին, գործողութեան ընթացքին գրաւած են մեծաքանակ ականներ, պայթուցիկ նիւթեր եւ զէնքեր: ՙԺընինի գործողութիւնը բարդ էր եւ շատ դժուար միջավայրի մէջ, սակայն իրագործեցինք մեր նպատակները՚, յայտարարեց իսրայէլեան բանակը:
Վարչապետ Պենիամին Նեթանիահու հաւաստիացուց, որ նման գործողութիւններ պիտի կրկնուին անհրաժեշտութեան պարագային:
Իսկ Կազայի մէջ, իսրայէլեան օդուժը թիրախաւորեց պաղեստինեան կազմակերպութիւններու հրթիռային համակարգերը, որոնց միջոցաւ Կազայէն հրթիռներ արձակուած էին իսրայէլեան բնակավայրերուն ուղղութեամբ:
Ռուսիոյ նախագահութիւնը ահազանգեց ուքրանական Զափորիժիա հիւլէակայանին մէջ Քիեւի կողմէ ձեռնարկուելիք խափանարար գործողութեան մը հաւանականութենէն, որուն հետեւանքները կրնան աղէտալի ըլլալ ամբողջ շրջանին համար: Յիշեցնենք, որ նշեալ հիւլէակայանը Եւրոպայի մեծագոյնն է, կը գտնուի Ուքրանիոյ հարաւային շրջանին մէջ եւ ամիսներէ ի վեր ականատես կը դառնայ ռուս-ուքրանական մարտերու: Միւս կողմէ, Հիւլէական ուժանիւթի միջազգային գործակալութիւնը ժխտեց նշեալ հիւլէակայանին մէջ պայթուցիկներու առկայութեան մասին տարածուած լուրերը:
