2002-էն ի վեր Այսդյորդանանի մէջ զինուորական մեծագոյն գործողութեամբ, իսրայէլեան բանակը երէկ առաւօտեան յարձակեցաւ Ժընին գաղթակայանին վրայ, գործածելով շուրջ 150 զրահապատ մեքենայ եւ ռազմական օդանաւեր: Պաղեստինեան Առողջապահութեան նախարարութիւնը յայտարարեց, թէ երէկ զոհուած է առնուազն 10 պաղեստինցի, բազմաթիւ վիրաւորներու կողքին: Առողջապահական ծառայութիւններուն համաձայն, զոհերուն թիւը կրնայ բարձրանալ, նկատի առնելով վիրաւորներու շարքին ծանր պարագաներու առկայութիւնը: Պաղեստինեան դիմադրութեան շարժումները իրենց կարգին վստահեցուցին, թէ կը շարունակեն պաշտպանել Ժընինը ականներով ու հրաձգութեամբª դիմակայելու համար թշնամիին շարժումները:
Իսրայէլի վարչապետ Պենիամին Նեթանիահու մեկնաբանեց զինուորական գործողութիւնը եւ շեշտեց, որ դրութիւնը փոխուած է, ՙիսկ անոնք որոնք այդ իրողութիւնը տակաւին չեն ըմբռնած, այժմ պիտի հասկնան: Մենք ահաբեկչութիւնը պիտի հարուածենք ամէն տեղ՚, ըսաւ Նեթանիահու: Իսրայէլեան բանակին համաձայն, Ժընինի գաղթակայանը վերածուած է օրինախախտներու ապաստարաին, ուստի անհրաժեշտ է միջամտել եւ փոխել այժմու կացութիւնը: Իսրայէլի արտաքին գործերու նախարար Էլի Գոհեն իր կարգին յայտնեց, որ իրենք չեն մտադրեր ընդարձակել գործողութիւններու շրջագիծը, ՙորովհետեւ մեր նպատակն է կեդրոնանալ Ժընինի վրայ եւ թիրախաւորել ահաբեկիչները միայն՚, պնդեց նախարարը:
