Հիւսիսային Պշարրի գաւառը երէկ հրաժեշտ տուաւ Հայսամ եւ Մալէք Թոքերուն, որոնք սպաննուեցան Քորնէթ Սաուտայի շրջանին մէջ տեղի ունեցած հրաձգութեան պատճառով: Թաղումի արարողութիւնը կատարեց մարոնիներու պատրիարք Պըշարա Ռահի կարտինալը, որ կոչ ուղղեց սահմանագծելու շրջանը եւ կանխելու խռովութիւնները: Ան նաեւ պահանջեց անյապաղ ձերբակալել եւ պատժել ոճրագործները: ՙՄենք կը հաւատանք պետութեան, գիտենք մեր սահմանը եւ ոճրագործը, որովհետեւ տեղի ունեցածը պարզապէս անցողակի արկած մը չէ՚, ըսաւ Ռահի:
Հայսամ եւ Մալէք Թոքերու յուղարկաւորութեան արարողութեան ընթացքին, Պշարրիի երեսփոխան Ուիլիամ Թոք իր եւ երեսփոխան Սթրիտա Ժաաժաայի անունով յայտարարեց. ՙմենք չենք կրաժարիր մեր հողին եւ ժողովուրդին արժանապատուութենէն, իսկ անոնց արիւնը մեր պատմական հողի կարմիր գիծ է՚, աւելցնելով որ զսպուածութեան կոչը թողութեան նման չէ: Իսկ Թոք գերդաստանը լարուած յայտարարութեամբ մը ապահովական ուժերուն եւ դատական առնչակից մարմիններուն կոչ ուղղեց անյապաղ բացայայտելու յանցագործները եւ ոճիրին մանրամասնութիւնները: ՙՏարակարծութեան պատճառաբանութիւնները պատմական եւ աշխարհագրական հիմք չունին, որովհետեւ մեր գաւառին սահմանը գծուած է օսմանեան տիրապետութեան օրերէն ի վեր՚, նշուած է յայտարարութեան մէջ: Յիշեցնելով, որ միշտ եղած է բանակին ու պետութեան կողքին, գերդաստանը ցաւ յայտնեց, որ բանակը չէ կրցած խաղալ արդար իրաւարարի դերը, այլ նոյնիսկ սպաննած է Մալէք Թոքը:
Միւս կողմէ, յարակից Տըննիյէ գաւառի քաղաքապետութիւններու համադաշնակցութիւնը կոչ ուղղեց քաղաքական շուկայէն հեռու պահելու միջադէպը, աւելցնելով որ բանակը բոլորին երաշխաւորն է:
