Ազգային ազատ հոսանքի նախագահ, երեսփոխան Ժըպրան Պասիլ յայտնեց, որ իրենց հետ պատահած բոլոր խնդիրներով հանդերձ, հոսանքը յանձնառու կը մնայ Հըզպալլայի հետ համաձայնութեան, նաեւ պատրաստ է խօսելու լիբանանեան բոլոր կողմերուն հետ` լուծումներու յանգելու համար: Յիշեցնելով, որ իրենք պատժամիջոցներու ենթարկուած են Հըզպալլայի հետ իրենց կապերուն համար, Պասիլ ըսաւ. ՙՄենք որոշեցինք զոհողութիւններու երթալ` յանուն Լիբանանի միասնականութեան պահպանումին եւ ազգային գործընկերութեան իրականացումին՚:
Հըզպալլայի ընդհանուր քարտուղարի տեղակալ շէյխ Նահիմ Քասէմ յայտնեց, որ Լիբանանի մէջ չէ մնացած նոր նախագահ ընտրելու միջոց, բացի երկխօսութենէն եւ թեկնածուի անունին շուրջ համաձայնութենէն:
