Ռուսական Դաշնութեան Արտաքին գործերու նախարարութեան խօսնակ Մարիա Զախարով յայտարարեց, թէ այն ուժերը, որոնք իշխանութեան հասցուցին Ուքրանիոյ մէջ ներկայիս իշխող վարչակարգը, անոր առջեւ դրին Ռուսիոյ հետ հոգեւոր յարաբերութիւնը քանդելու նպատակ: Ուքրանիոյ վարչակարգը քանդեց երկու ժողովուրդներուն միջեւ եղող տնտեսական, պատմական եւ մշակութային կապը: Ուքրանիոյ մէջ իշխող վարչակարգը կը փորձէ ուքրանացի ժողովուրդին պարտադրել արեւմտեան արժէքներ:
Միւս կողմէ, Ռուսական դաշնութեան ներքին ապահովութեան ուժերը ձերբակալեցին հինգ անձեր, որոնք կը փորձէին երկրէն դուրս հանել մէկ քիլոկրամ սիզիում 137, որ կը համարուի շողարձակող մետաղ եւ կ’օգտագործուի վնասակար պայթուցիկ պատրաստելու համար: Ձերբակալուած անձերը այս նիւթը պիտի օգտագործէին վնաս հացնելու համար Ռուսիոյ վարկին արտաքին աշխարհին մէջ:
Ռուսական դաշնութեան Ապահովութեան խորհուրդը յայտարարեց, թէ Արեւմուտքը կը փորձէ ամէն միջոցով վնասել Ռուսիա-Ղազախստան յարաբերութեան: Ըստ խորհուրդին, Արեւմուտքը Միացեալ Նահանգներու առաջնորդութեամբ ամէն սադրանքի կը դիմէ ազգային շահեր շահագործելով ու համացանցը օգտագործելով որպէս միջոցª տարածելու համար այս սադրանքը: Արեւմուտքը չ՛ուզեր որ Ռուսիա եւ իրեն դրացի բարեկամ երկիրներ ըլլան համերաշխ ու զարգանան միասնաբար:
Ռուսական դաշնութեան Արտաքին գործերու նախարարութիւնը յայտարարեց, թէ ԱՄՆ ամէն միջոցի կը դիմէ Հնդկաստանը միացնելու համար իր աշխարհաքաղաքական դաշնակիցներու խումբին:
