Կիրակի, 18 Յունիս 2023-ի առաւօտեան, Նիկոսիոյ Ս. Աստուածածին Մայր եկեղեցւոյ մէջ տեղի ունեցաւ հոգեհանգիստª Հնչակեան քսան կախաղաններուն, որոնք 15 Յունիս 1915-ին, Պոլսոյ Սուլթան Պայազիտ հրապարակին վրայ բարձրացան կախաղան, յանուն Հայաստանի ու հայութեան:
Շուրջ դար մը առաջ Թուրքիոյ հրապարակներուն վրայ քաջօրէն կախաղան կը բարձրանային հայ ժողովուրդի ազգային ազատագրական պայքարին նուիրուած հնչակեան գործիչներ: Քսան անմահներու յիշատակի ոգեկոչումով անգամ մը եւս վեր առնուեցաւ հնչակեան հերոսներուն խիզախութիւնը, որուն արհամարհեցին մահը յանուն հայ ժողովուրդին եւ Հայաստանին: Քսան անմահներ, որոնք կախաղան բարձրացան, բայց թոյլ չտուին որ իրենց յեղափոխական ոգին սպաննուի, եւ իրենց նահատակութեամբ պատգամ փոխանցեցին յաջորդող սերունդներունª անշահախնդրօրէն սիրելու հայրենիքը, տէր կանգնելու անոր ամբողջականութեան եւ պայքարելու ի խնդիր հայ ազգի բարօրութեան:
Հոգեհանգստեան արարողութեան պատարեգեց ու քարոզեց եկեղեցւոյ հոգեւոր հովիւª Արժ. Տ. Մոմիկ Քհնյ. Հապէշեանը, որ օրուան աւետարանական հատուածին ընդմէջէն վեր առաւ քաջարի հերոսներուն նուիրուածութիւնն ու նահատակութիւնը:
Հոգեհանգստեան արարողութեան նախագահեց Թեմիս Կաթողիկոսական Փոխանորդª Գերշ. Տ. Խորէն Արք. Տողրամաճեանը: Ներկայ էին Կիպրոսի Ս.Դ.Հ.Կ. Վարիչ մարմինի ատենապետ Ընկ. Գէորգ Զէյթունցեան եւ անդամներ, Գանատայէն հիւրաբար ժամանածª Ս.Դ.Հ.Կ. Կեդրոնական վարչութեան անդամ Ընկ. Համբիկ Թաթուլեան, որոնք պատարագէն ետք Ապրիլեան Նահատակաց Յուշարձանին առջեւ Սրբազան Հօր հետ միասին ծաղկեպսակ զետեղեցին:
