Հայաստանի հանրապետութեան արտաքին գործերու նախարար Արարատ Միրզոյեան Մինսքի մէջ տեղի ունեցող ՀԱՊԿ կազմակերպութեան անդամ երկիրներու արտաքին գործերու նախարարներու ժողովին տեղեկացուցած է իր գործընկերներուն Հայաստան-Ատրպէյճան սահմանին վրայ վիճակի եւ Արցախի վերջին զարգացումներու մասին: Միրզոյեան անդամ երկիրներու իր գործընկերներուն անգամ մը եւս յիշեցուցած է, թէ Ատրպէյճան տակաւին գրաւած կը պահէ Հայաստանի տարածք եւ կը վարէ յարձակողական քաղաքականութիւն: Ատրպէյճան վեց ամիսէ ի վեր շրջապատուած կը պահէ Արցախը: Այս հարցը կը պատճառէ մարդասիրական մեծ տագնապ: Ան պահանջած է աւելի լուրջ վերաբերում այս հարցերուն շուրջ, որովհետեւ Ատրպէյճանի քայլերուն նպատակն է ապակայունացնել Հարաւային Կովկասի շրջանը:
