Իրանի իսլամական յեղափոխութեան հոգեւոր գերագոյն առաջնորդ այաթոլլա Ալի Խամինէի յայտնեց, որ հիւլէական համաձայնագրի մը ստորագրումը հնարաւոր է, պայմանաւ որ չվտանգուին Իրանի հիւլէական արդիւնաբերութեան ենթակառոյցները:
Միւս կողմէ, Իսրայէլի վարչապետ Պենիամին Նեթանիահու յայտնեց, որ Իրանի հիւլէական թղթածրարին առնչութեամբ զրուցած է Միացեալ Նահանգներու արտաքին գործերու նախարար Անթոնի Պլինքընի հետ ու շեշտած, որ Ուաշինկթընի եւ Թեհրանի միջեւ հիւլէական որեւէ համաձայնութիւն պարտաւորիչ պիտի չըլլայ Իսրայէլին: Ըստ Նեթանիահուի, ՙհիւլէական որեւէ համաձայնութիւն վերջ պիտի չտայ Իրանի հիւլէական ծրագրին, այլ պարզապէս հնարաւորութիւն պիտի տայ նիւթական գումար փոխանցելու շրջանին մէջ գործող ահաբեկչական կազմակերպութիւններուն՚:
Իսկ Ծոցի արաբական երկիրներու համագործակցութեան կազմակերպութիւնը շեշտեց, որ Իրան իր հիւլէական ծրագրին առնչութեամբ պէտք է յանձնառու մնայ Հիւլէական ուժանիւթի միջազգային գործակալութեան հետ ամբողջական համագործակցութեան պարտաւորութեան: Կազմակերպութեան նախարարական խորհուրդի 156-րդ նիստին ընթացքին շեշտուեցաւ, որ խաղաղ նպատակներով եուրանիւմի հարստացումին հարցով Թեհրան պէտք չէ հատէ արտօնուած սահմանը, իսկ բանակցութիւնները պէտք է ներառեն Ծոցի արաբական երկիրներուն ապահովական մտահոգութիւնները եւս: Ժողովականները շեշտեցին, որ Ծոցի երկիրները պէտք է մասնակից դառնան Իրանի բանակցային բոլոր փուլերուն:
