Հանրապետութեան նախագահի ընտրութեան համար սկզբունքով Չորեքշաբթի, 14 Յունիսին, գումարուելիք երեսփոխանական նիստի նախօրէին բազմացած են քաղաքական յայտարարութիւնները եւ թեկնածուներուն անունները: Անկախ երեսփոխան Ապտէլ Ռահման Պըզրի խոստացաւ բացայայտել այն երրորդ անունը, որուն ի նպաստ որպէս միջին լուծում պիտի քուէարկեն ինք եւ շարք մը այլ անկախ երեսփոխաններ: Պըզրիի համաձայն, իրենք պիտի փորձեն նախագահի ընտրութեան նիւթը վերադարձնել ազգային ուղեգիծին, որովհետեւ ան շեղելով ստացած է յարանուանական եւ համայնքային ուղութիւն: Իր կարգին, անկախ երեսփոխան Էլիաս Ժրատէ երէկ մամլոյ ասուլիսի մը ընթացքին յայտնեց, որ պիտի մասնակցի խորհրդարանի նիստին եւ քուէարկէ ի նպաստ նախկին նախարար Զիատ Պարուտին:
Լիբանանեան ուժեր կուսակցութեան նախագահ Սամիր Ժաաժաա շեշտեց, որ ՙ14 Յունիսին սպիտակ քուէաթերթիկով կամ զարմանալի անուններով ընտրողները խորքին մէջ օժանդակած պիտի ըլլան ընտրական նիստը խափանողներուն՚: Իսկ Փաղանգաւոր կուսակցութեան նախագահ Սամի Ժըմայէլ նշեց, որ նախագահի ընտրութեան հարցով համաձայնութեան յանգած են Ազգային ազատ հոսանքի նախագահ Ժըպրան Պասիլի հետª յանուն երկու կողմերու շահերուն: Ժըմայէլ նշեց, որ իրենք առաջադրած են նախկին նախարար Ժիհատ Ազհուրի թեկնածութիւնը, որովհետեւ ան անկախ է, ունի անձնական անհրաժեշտ կարողութիւններ եւ տնտեսական ու քաղաքական փորձառութիւն: ՙՀըզպալլան ուղղակի պատասխանատուն կը համարեմ ապահովական հաւանական զարգացումներուն համար՚, ըսաւ Ժըմայէլ, մտավախութիւն յայտնելով քաղաքական գործիչներու ահաբեկումի ալիքի կրկնութեան առնչութեամբ:
Մարոնիներու պատրիարք Պըշարա Ռահի կարտինալը վերստին անդրադարձաւ նոր նախագահի ընտրութեան թղթածրարին եւ բողոքեց, որ ՙմինչ ժողովուրդը կը սպասէ նոր նախագահի ընտրութիւնը, քաղաքական կողմեր կը խօսին խորհրդարանի ընտրական նիստը խափանելու մասին, ինչ որ կը խորացնէ պետութեան խնդիրները՚:
Իսկ մուֆթի շէյխ Ահմատ Քապալան մերժելի համարեց ՙամերիկեան կնիքով ընտրուած նախագահ մը՚: Զգուշացնելով ազգային ուխտի կարգերը խախտելով նախագահ ընտրելէ, Քապալան դժգոհեցաւ, որ ՙնախագահի թղթածրարին հարցով ամերիկեան թունաւոր միջամտութիւնը ակնյայտ է՚:
