Երէկ շարունակուեցան Կազայի հատուածին մէջ եւ անոր շուրջ տեղի ունեցող բախումները իսրայէլեան ուժերու եւ պաղեստինեան կազմակերպութիւններու զինեալներուն միջեւ: Իսրայէլեան օդուժը կը ռմբակոծէ Կազայի մէջ գտնուող թիրախներ, պատճառելով ցարդ 33 զոհ եւ 111 վիրաւոր պաղեստինցիներու շարքերէն, որոնցմէ 3-ը կիներ եւ 6-ը երեխաներ են: Իսրայէլ անօդաչու թռչող սարքեր կ’օգտագործէ հարուածելու համար այն ականանետերը, որոնք կը ռմբակոծեն իսրայէլեան բնակավայրերը: Իսրայէլեան ռմբակոծումին զոհուեցաւ ղեկավար մը Ժիհատ Իսլամի կազմակերպութեան ՙՍարայա Ալ Քուտս՚ գումարտակէն: Պաղեստինեան կազմակերպութիւնը սպառնաց իր հրթիռները հասցնել Իսրայէլի խորերը որպէս հակադարձութիւն այս ահաբեկումներուն:
Իսրայէլի ձայնասփիւռը հաղորդեց, որ Իսրայէլ տեղեակ պահած է եգիպտացիները, թէ դադրեցուցած է բանակցութիւնները զինադուլի հասնելու համար: Այսօր պաղեստինեան կազմակերպութիւններու արձակած հրթիռները հասան մինչեւ Երուսաղէմ:
