Որեւէ կասկած չկայ, թէ Զատիկի տօնական ժամանակահատուածը այս տարի արտասովոր պիտի ըլլայ լիբանանցիներու առնուազն մեծամասնութեան համար: Ճիշդ է, որ համաճարակային մտավախութիւնները գրեթէ անհետացած են, սակայն անոնց կը փոխարինեն նոյնքան վտանգաւոր եւ մտահոգիչ տնտեսական եւ ապրուստային խնդիրները, որոնք արդէն ամիսներէ ի վեր կը հիւծեն լիբանանցիներըª հարուածելով տնտեսական գրեթէ բոլոր ոլորտներըª թէ՛ հանրային, թէ՛ սեփական: Տոլարի փոխարժէքի չնչին նուազումը չփարատեց լիբանանցիներուն մտահոգութիւնները եւ շաբաթավերջին բողոքելու հերթը հասած էր կառավարական հիւանդանոցներու աշխատակիցներուն, որոնք պահանջեցին բարելաւել ՙՍայրաֆա՚ հարթակին սակագինը, սպառնալով հակառակ պարագային դիմել գործադուլի:
Ինչ կը վերաբերի հաղորդակցութեանց ոլորտի ճգնաժամին, ապա նախարարի պաշտօնակատար Ճոնի Քըրմ յաջողեցաւ խոստումներով հասնիլ Օժերօ հաստատութեան պաշտօնեաներու գործադուլի առկախումին, մինչեւ գործող կառավարութեան յաջորդ նիստը, որուն ընթացքին ենթադրաբար պիտի արծարծուի նշեալ թղթածրարը եւս:
