Թուրքիոյ նախագահ Ռեճեպ Թայիպ էրտողան յայտարարեց, թէ որոշում կայացուց Թուրքիոյ խորհրդարանին մէջ սկսելու Ֆինլանտայինª ՆԱԹՕ-ի անդամակցութեան քննարկումները: Ան յոյս յայտնեց, որ խորհրդարանը կը վաւերացնէ Ֆինլանտայի ՆԱԹՕ-ին անդամակցութիւնը նախագահական ընտրութիւններէն առաջ: Ընտրութիւնը տեղի պիտի ունենայ 14 Մայիսին: Ան հաստատեց, որ Ֆինլանտայի անդամակցութիւնը ՆԱԹՕ-ին պիտի ունենայ դրական արդիւնք: Շուէտի պարագային, ան հաստատեց, որ պիտի շարունակեն բանակցութիւնը այդ երկրին հետ եւ իրենց հաւանութիւնը կախեալ է այդ երկրի հակաահաբեկչական քաղաքականութենէն: Հարկ է նշել, որ Թուրքիա Շուէտէն կը պահաջէ իրեն յանձնել բոլոր քիւրտ ընդդիմադիրները, որոնք ապաստան գտած են այդ երկրին մէջ: Ըստ Թուրքիոյ, բոլոր քիւրտ ընդդիմադիրները ահաբեկիչներ են:
