Լիբանանին տրամադրուող միջազգային օժանդակութիւնները համակարգող եւ Ֆրանսայի նախագահի Միջին Արեւելքի հարցերու խորհրդական Փիէռ Տիւքան Փարիզի մէջ ընդունեց ուժանիւթի եւ ջուրի հարցերու նախարարի պաշտօնակատար Ուալիտ Ֆայյատը, որուն հետ քննարկեց Լիբանանի ուժանիւթային թղթածրարները: Տիւքան կարեւորեց Լիբանանի ելեկտրականութեան ոլորտի վնասներու խոհեմ տնօրինումը, կոչ ուղղելով արագացնելու ուժանիւթային ոլորտի բարեփոխումները եւ հիմնելու ելեկտրականութեան ոլորտը կարգաւորող խորհուրդ: Ան դրուատեց ելեկտրականութեան իրապաշտ ծրագիրը եւ խոստացաւ շարունակաբար աջակցիլ Լիբանանին, պայմանաւ որ Պէյրութի իշխանութիւնները գործադրեն անհրաժեշտ բարեփոխումներու ծրագիրը:
