Արցախեան առումով երէկ վերստին լուսարձակի տակ անցաւ Արցախի Հանրապետութիւնը Հայաստանին կապող միակ` Լաչինի ճամբան, ուր դարձեալ տեղի ունեցան ատրպէյճանական խափանարար արարքներ, որոնց պատճառով ժամեր շարունակ փակ մնաց մայրուղին: Միջադէպը տեղի ունեցաւ մասնաւորաբար Մեծ շէն, Հին շէն եւ Եղցահող գիւղերուն մօտ, որոնց մայրաքաղաքին հետ կապը անջատուեցաւ: Արցախի Ներքին գործերու նախարարութիւնը ահազանգեց այդ մասին եւ նշեց, որ հարիւրաւոր ճամբորդներ ճամբուն վրայ արգելափակուած են իրենց ինքնաշարժներուն մէջ, մինչ շարք մը արցախցիներ վերադարձած են Գորիս:
Հայաստանի մարդկային իրաւունքներու նախկին պաշտպան Արման Թաթոյեանի հիմնադրամը եւս ահազանգեց,որ Արցախը Հայաստանին կապող ճամբան փակուած է ատրպէյճանական իշխանութիւններուն կազմակերպմամբ:
Նշենք, որ ատրպէյճանցի ՙկենսոլորտի պաշտպաններ՚ երէկ դարձեալ հաւաքուեցան ճամբուն վրայ եւ զայն փակեցին` ռուս խաղաղապահներու անմիջական ներկայութեամբ: Ատրպէյճանցիները շուտով վրաններ լարեցին եւ պահանջեցին տեսակցիլ խաղաղապահներուն հետ:
Արցախի Հանրապետութեան նախագահ Արայիկ Յարութիւնեան համոզում յայտնեց, որ խաղաղապահ զօրակազմը անհրաժեշտ գործիքներուն կը դիմէ` կանխելու համար հակառակորդի խափանարար արաքները: Արցախի Ազգային ժողովի խմբակցութիւնները միացեալ յայտարարութեամբ մը ռուս խաղաղապահներուն կոչ ուղղեցին աւելի կոշտ միջոցներով կանխելու ատրպէյճանցիներուն արարքները: Իսկ նախագահի խորհրդական Արտակ Բեգլարեան հաւաստիացուց, որ զիջումներ պիտի չըլլան ատրպէյճանական ճնշումի նմանօրինակ միջոցներուն դիմաց: Իսկ Արցախի մարդկային իրաւունքներու պաշտպան Գեղամ Ստեփանեան ահազանգեց, որ թշնամիի արարքներուն պատճառով 120 հազար հայ ենթակայ է ցեղասպանութեան վտանգին:
Հայաստանի վարչապետ Նիկոլ Փաշինեան հեռաձայնային հաղորդակցութիւն ունեցաւ Ռուսիոյ նախագահ Վլատիմիր Փութինի հետ եւ արծարծեց Լաչինի միջանցքին մէջ ստեղծուած խնդիրները, ինչպէս նաեւ լուծումի միջոցները: Փաշինեան կարեւորեց, որ անխափան կապ ապահովելու ուղղութեամբ ռուս խաղաղապահներու առաքելութիւնը իրականացնէ հետեւողական քայլեր: Փութին նաեւ զրուցեց իր ատրպէյճանցի պաշտօնակից Իլհամ Ալիեւի հետ` քննարկելու համար եռակողմանի համաձայնութիւններու կատարումը: Իսկ ֆրանսացի երեսփոխան Վալերի Պուայէ միջազգային ընտանիքին կոչ ուղղեց խստօրէն դատապարտելու ատրպէյճանական գործողութիւնները Արցախի մէջ:
