3 Դեկտեմբերին Հայաստանեայց Առաքելական Սուրբ Եկեղեցին տօնախմբեց հայոց առաջին լուսաւորիչներ Սուրբ Թադէոս եւ Սուրբ Բարդուղիմէոս առաքեալներուն տօնը: 2014 թուականին Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսի սրբատառ կոնդակով տօնը հռչակուած է Աստուածամուխ Սուրբ Գեղարդի ուխտի օր: Այդ օրը հաւատացեալներու օրհնութեան եւ երկրպագութեան համար դուրս կը բերուի Մայր Աթոռ Սուրբ Էջմիածնի մէջ պահուող համաքրիստոնէական սրբութիւնը:
Տօնին առիթով Մայր Աթոռ Սուրբ Էջմիածնի Սուրբ Յովհաննէս Մկրտիչ եւ Սուրբ Վարդան մատուռ-մկրտարանին մէջ մատուցուեցաւ Սուրբ Պատարագ: Պատարագիչն էր Մայր Աթոռի թանգարաններու եւ արխիւի տնօրէն հոգեշոնրհ Տ. Ասողիկ աբեղայ Կարապետեանը:
Սուրբ Պատարագին ներկայ էին Մայր Աթոռի մէջ պաշտօնավարող եպիսկոպոսներ, միաբաններ, հայաստանեան թեմերու առաջնորդներ եւ բազմաթիւ ուխտաւորներ:
Սուրբ Պատարագի ընթացքին եկեղեցական թափօրի առաջնորդութեամբ Գարեգին Բ. Ամենայն Հայոց կաթողիկոսի ձեռամբ մատուռ-մկրտարան բերուեցաւ աստուածամուխ Սուրբ Գեղարդը:
Իր քարոզին մէջ Հայր Սուրբը, անդրադարձ կատարելով տօնի խորհուրդին եւ եկեղեցւոյ առաքելութեան, ի մասնաւորի նշեց. ՙԵկեղեցին գիշեր եւ զօր իր ամբողջ կարողութեամբ Աստուծոյ խօսքը կը բաշխէ մեզ բոլորիս: Ինչպէս դարեր առաջ առաքելական քարոզչութեամբ մեր նախնիները իրենց սրտերը բացին Աստուծոյ լոյսին առջեւ եւ դարձան հետեւորդները Քրիստոսի, այնպէս ալ մենք այսօր հաւատարմօրէն կը հետեւինք Քրիստոս Աստուծոյ, հետեւինք Անոր Սուրբ Եկեղեցիին եւ թոյլ չտանք, որ այս դժուարին օրերուն խաւարը յաղթէ լոյսին՚:
Հայր Ասողիկը յորդորեց անդադար լսել Առաքելական Սուրբ Եկեղեցւոյ պատգամները եւ զանոնք կեանքի կոչել, որպէսզի արժանի ըլլանք Աստուծոյ արքայութեան, որ մեր մէջ է եւ Սուրբ Թադէոս ու Սուրբ Բարդուղիմէոս առաքեալներու բարեխօսութեամբ բարձր պահենք հայոց առաջին լուսաւորիչներու հանդիպումով հայոց աշխարհին մէջ հաստատուած խաչը:
Սուրբ Պատարագի աւարտին Հայոց Հովուապետը ՙՊահպանիչ՚ աղօթքով եւ հրաշագործ Սուրբ Գեղարդով օրհնեց ներկայ ժողովուրդը, ապա հաւատացեալներուն հնարաւորութիւն ընձեռուեցաւ երկրպագելու եւ համբուրելու համաքրիստոնէական սրբութիւնը:
Աստուածամուխ Սուրբ Գեղարդը Մայր Աթոռի մարտուռ-մկրտարանին մէջ մնաց մինչեւ Երեկոյեան ժամերգութեան աւարտը:
