Լիբանանի Հանրապետութեան նախագահ Միշէլ Աուն իր արտասանած ճառին մէջ հաստատեց հարաւային ծովային սահմանագծումի հարցով Լիբանանի համամտութիւնը: Աուն այս համաձայնագիրի յաջողութիւնը նուիրեց Լիբանանի համբերատար ժողովուրդին, որ դիմացաւ ամէն զրկանքի ու դիմադրութեան շարժումին, որուն նեցուկը մեծ դեր խաղցաւ այս յաջողութեան մէջ:
Նախագահը յայտարարեց, թէ յաջորդ քայլը պիտի ըլլայ բանակցիլ Սուրիոյ հետ, սահմանելու համար այդ երկրին հետ Լիբանանի ծովային սահմանները, նաեւ նոյն քալյը պիտի կատարուի Կիպրոսի հետ:
Աուն աւելցուց, որ հակառակ արտաքին ճնշումին, Լիբանան դարձաւ քարիւղի պետութիւն եւ ֆրանսական ՙԹոթալ՚ ընկերութիւնը պէտք է սկսի հորատումի գործողութիւնի ՙԿանա՚ դաշտէն: Նախագահը դրուատեց 860 քառակուսի քիլոմեթրի վերադարձը լիբանանեան սահմաններուն մէջ եւ ՙԿանա՚ դաշտի իրաւունքին տիրանալը, հակառակ անոր որ ան ամբողջութեամբ չի գտնուիր լիբանանեան տարածքին մէջ:
Ըստ ստոյգ աղբիւրներու, Ֆրանսայի նախագահ Էմանուէլ Մաքրոն ՙԹոթալ՚ ընկերութենէն պահանջած է սկսիլ հորատումի գործողութեան ՙԿանա՚ դաշտին մէջ եւ Իսրայէլի բաժինը վճարել ընկերութեան հաշուոյն:
