Հայաստանի արտաքին գործերու նախարար Արարատ Միրզոյեանը ընդունած է Ֆրանսայի Ծերակոյտի Ֆրանսա-Հայաստան բարեկամական խումբի նախագահ Ժիլպեր-Լիւք Տըւինազի գլխաւորած պատուիրակութիւնը:
Նախարար Միրզոյեան ողջունած է ֆրանսացի ծերակուտականներու պատուիրակութեան այցը Հայաստան` գնահատելով հայ-ֆրանսական բարեկամութեան եւ համերաշխութեան ցուցաբերած շարունակական նուիրուածութիւնը:
Զրուցակիցները քննարկած են հայ-ֆրանսական յարաբերութիւններուն առնչուող շարք մը հարցեր, մասնաւորապէս միտքեր փոխանակուած են հայ-ֆրանսական ապակեդրոնացուած համագործակցութեան զարգացման շուրջ:
Հանդիպման ընթացքին անդրադարձ կատարուած է տարածշրջանային անվտանգութեան եւ խաղաղութեան վերաբերող հարցերուն: Նախարար Միրզոյեան ֆրանսացի ծերակուտականներուն ներկայացուցած է ՀՀ ինքնիշխան տարածքին նկատմամբ Ատրպէյճանի սանձազերծած յարձակման հետեւանքով ստեղծուած իրավիճակը` բարձր գնահատելով ֆրանսական կողմին հասցէական գնահատականները եւ սկզբունքային դիրքորոշումը:
ՀՀ արտաքին գործերու նախարարը ընդգծած է, որ Ատրպէյճանի առաւելապաշտական քաղաքականութիւնը, ուժի կամ ուժի կիրառման սպառնալիքի միջոցով խնդիրներու լուծման հասնելու փորձերը անթոյլատրելի են եւ պէտք է միանշանակօրէն դատապարտուին միջազգային հանրութեան կողմէ:
Արարատ Միրզոյեան ներկայացուցած է Հայաստան-Ատրպէյճան յարաբերութիւններու, Լեռնային Ղարաբաղի հակամարտութեան կարգաւորման վերաբերեալ հայկական կողմին դիրքորոշումը: Կարեւորուած է Հարաւային Կովկասի մէջ խաղաղութեան հաստատման գործին մէջ Ֆրանսայի ջանքերը, այդ շարքին` որպէս ԵԱՀԿ Մինսքի խմբակի համանախագահ երկիր:
Նախարար Միրզոյեան կարեւորած է նաեւ Ֆրանսա-Հայաստան բարեկամական խումբին գործունէութիւնը` ուղղուած Ծերակոյտին մէջ Լեռնային Ղարաբաղի ու արցախահայութեան իրաւունքներու պաշտպանութեան:
