Հայաստանի Հանրապետութեան վարչապետ Նիկոլ Փաշինեան ընդունած է Վերակառուցման եւ զարգացման եւրոպական դրամատան (ՎԶԵԴ) նախագահ Օտիլ Ռենօ-Պասսօն:
Վարչապետը կարեւորած է ՀՀ կառավարութեան եւ ՎԶԵԴ-ի միջեւ ձեւաւորուած սերտ եւ արդիւնաւէտ համագործակցութիւնը, որուն հետեւանքով Հայաստանի մէջ տարբեր ոլորտներու մէջ կ՛իրականացուին բազմաթիւ ծրագրեր:
Նիկոլ Փաշինեան նշած է, որ այս տարի կը լրանայ երկկողմ համագործակցութեան 30-ամեակը եւ այս երեք տասնամեակներու համագործակցութիւնը երթալով ալ աւելի զարգացած ու ամրապնդուած է:
Վարչապետին խօսքով` այդ փոխգործակցութիւնը նպաստած է նաեւ ՀՀ տնտեսութեան կայունութեան, այդ շարքին` կորոնաւիրուսի պանդեմիայի ընթացքում:
Գործադիրի ղեկավարին խօսքով` Հայաստանի մէջ իրականացուող ժողովրդավարական բարեփոխումները, նաեւ տնտեսութեան բնագաւառին մէջ, կ՛իրականացուին յաջողութեամբ, որուն հետեւանքով տնտեսական ազատութեան համաշխարհային ցուցակին մէջ Հայաստանը բարձրացած է 11-րդ հորիզոնական:
Վարչապետը համոզմունք յայտնած է, որ այդ ամէնը պիտի նպաստէ Հայաստանի հետագայ տնտեսական աշխուժութեան ու զարգացման:
ՎԶԵԴ նախագահը եւս գոհունակութիւն յայտնած է ՀՀ կառավարութեան հետ փոխգործակցութենէն եւ յաւելած, որ իրականացուող համատեղ ծրագրերը շարունակաբար կ՛ընդլայնուին: Պասսօն կարեւորած է ենթակառուցուածքներու զարգացման, ճանապարհաշինութեան, մասնաւոր հատուածի եւ այլ ուղղութիւններով ծրագիրներու իրականացումը եւ նշած է, որ ՎԶԵԴ-ը պատրաստ է ընդլայնելու երկկողմ փոխգործակցութիւնը:
Հանդիպման ընթացքին զրուցակիցները քննարկած են հետագայ համագործակցութեան վերաբերող տարբեր հարցեր:
