Աւելի յաճախակի դարձած է յաճախորդներու մուտքը դրամատուն եւ բռնի պահանջքը իրենց ի պահ դրած գումարը ստանալու համար: Երէկ դարձեալ տեղի ունեցան դէպքեր Լիբանանի զանազան շրջաններու մէջ եւ յաճախորդը իր ի պահ դրած գումարէն մաս մը առած հեռացաւ դրամատունէն: Սակայն այս բոլորը լաւ նշաններ չեն երկրի տնտեսական եւ ընկերային վատ վիճակին մասին:
Միւս կողմէ, Լիբանանի դրամատուներու պաշտօնեաներու սենտիքայի նախագահ Ասատ Խուրի յայտարարեց, որ եթէ կառավարութիւնը չկարենայ զսպել այս սանձարձակ վիճակը, հեռու չէ այն օրը, երբ դրամատուները կը փակեն իրենց դռները: Ինչ որ կը պատահի դրամատուներու նկատմամբ հասած է ծրագրուած աշխատանքի սահմանին: Ան առաջարկեց իւրաքանչիւր դրամատան մէջ հաստատել յաճախորդներու յանձնախումբ մը, որ կարելիի սահմանին մէջ լուծէ մարդոց առօրեայ հարցերը մինչեւ որ կառավարութիւնը մշակէ յստակ ծրագիր` այս կարեւոր հատուածին հարցերը լուծելու համար:
Նոյնպիսի առաջարկ մը կատարեց Յաճախորդներու համախմբումի նախագահը, պահանջելով կարելիի սահմանին մէջ լուծել յաճախորդներուն հարցերը, որպէսզի չդիմեն բռնութեան եւ երկիրը չհասնի քաոսային վիճակի:
