Հայաստանի Հանրապետութեան շարք մը գերատեսչութիւններ յայտարարութիւն տարածած են` հանրութեան յորդորելով մասնաւոր նախաձեռնութիւն չցուցաբերել զինուորներուն եւ սահմանամերձ մարզերու բնակիչներուն համար առաջնային անհրաժեշտութեան պարագաներ հաւաքագրելու առնչութեամբ:
ՙԱտրպէյճանական ռազմական յարձակման լոյսին տակ յաճախակի դարձած են դէպքերը, երբ բազմաթիւ քաղաքացիներ եւ մասնաւոր ընկերութիւններ, փորձելով օգտակար ըլլալ մարտական գործողութիւններու ընթացքին վիրաւորում ստացած զինուորներուն, սեփական նախաձեռնութեամբ տարբեր դեղամիջոցներ եւ սնունդ ձեռք կը բերեն` զայն զինուորական հիւանդանոցներուն փոխանցելու նպատակով: Պաշտպանութեան նախարարութիւնը բարձր կը գնահատէ մեր համաքաղաքացիներուն պատրաստակամութիւնը` հնարաւորութեան սահմաններուն մէջ օգտակար ըլլալու բանակին:
Այդուհանդերձ, կը վստահեցնենք, որ բոլոր հիւանդանոցները ապահովուած են զինուորներուն բուժումը պատշաճ կերպով կազմակերպելու համար: Միեւնոյն ժամանակ, քաղաքացիներուª հիւանդանոցներուն օգնութիւն փոխանցելու գործընթացը յաւելեալ ծանրաբեռնուածութիւն կ՛առաջացնէ բժշկական հաստատութեան անձնակազմին համար, ինչ որ այս պահուն անցանկալի է՚, նշուած է Պաշտպանութեան նախարարութեան տարածած հաղորդագրութեան մէջ:
ՀՀ Առողջապահութեան նախարարութիւնն ալ կը տեղեկացնէ, որ հանրապետութեան բժշկական կեդրոնները ապահովուած են անհրաժեշտ դեղորայքով եւ բժշկական պարագաներով: Այս պահին անոնց հաւաքագրման անհրաժեշտութիւնը չկայ:
Աշխատանքի եւ ընկերային հարցերու նախարարութիւնը եւս կը յորդորէ դադրեցնել զինուորներումն կամ սահմանամերձ մարզերու բնակիչներուն ուղարկելու նպատակով սնունդ, հագուստ եւ առաջնային անհրաժեշտութեան պարագաներու հաւաքագրման գործընթացը:
ՙՊետութիւնը` ի դէմս պատասխանատու գերատեսչութիւններուն, կը շարունակէ ապահովել անհրաժեշտ կարիքներու բաւարարումը:
Ոլորտային հասարակական կազմակերպութիւններուն եւս կը յորդորենք իւրաքանչիւր նախաձեռնութիւն սկսելէ առաջ դրա իրականացման անհրաժեշտութիւնը քննարկել Աշխատանքի եւ ընկերային հարցերու նախարարութեան հետ՚, մասնաւորապէս ըսուած է Աշխատանքի եւ ընկերային հարցերու նախարարութեան հաղորդագրութեան մէջ:
