ԵԱՀԿ-Ի ՄԷՋ ՀՀ ՆԵՐԿԱՅԱՑՈՒՑԻՉ
ԵԱՀԿ-ի մէջ ՀՀ մշտական ներկայացուցիչ Արմէն Պապիկեան մասնակցած եւ ելոյթով հանդէս եկած է Հայաստանի նախաձեռնութեամբ հրաւիրուած ԵԱՀԿ Մշտական խորհուրդի յատուկ նիստին:
Արմէն Պապիկեան ԵԱՀԿ Մշտական խորհուրդի մասնակիցներուն ուշադրութիւնը հրաւիրած է Հայաստանի Հանրապետութեան ինքնիշխան տարածքին նկատմամբ Ատրպէյճանի կողմէ 13 Սեպտեմբերին սանձազերծուած ռազմական յարձակման:
Դեսպան Պապիկեան նշած է, որ Ատրպէյճանի զինուած ուժերը, միջազգային մարդասիրական իրաւունքի եւ Ժընեւի ուխտերու բացայայտ խախտմամբ, գնդակոծութեան ենթարկած են հայկական շարք մը բնակավայրեր` օգտագործելով ծանր սպառազինութիւն, այդ շարքին` հրետանային միջոցներ, ականանետներ ու ԱԹՍ-ներ:
Նշուած է, որ Ատրպէյճանի այս յարձակումը ԵԱՀԿ հիմնարար սկզբունքներուն եւ յանձնառութիւններուն, ՄԱԿ կանոնադրութեան եւ Հելսինքեան եզրափակիչ արաքին կոպտագոյն խախտում է:
Անդրադառնալով միջազգային հանրութեան պատշաճ արձագանգի անհրաժեշտութեան` դեսպան Պապիկեան ընդգծած է Հայաստանի դէմ Ատրպէյճանի յարձակման յստակ եւ միանշանակ դատապարտման կարեւորութիւնը ԵԱՀԿ եւ անոր մասնակից պետութիւններուն կողմէ: Շեշտուած է, որ միայն Ատրպէյճանի նախայարձակ գործողութիւններուն վերաբերեալ յստակ արձագանգը եւ համարժէք գնահատականը, ներառեալ միջազգային հանրութեան կողմէ համապատասխան գործուն քայլերը կրնան կանխել նոր պատերազմը տարածաշրջանին մէջ:
Ան նշած է, որ ուժի կամ ուժի սպառնալիքի հետագայ կիրառումը կը խաթարեն տարածաշրջանին մէջ ընթացող գործընթացները` ուղղուած Հարաւային Կովկասի մէջ խաղաղութեան եւ անվտանգութեան հաստատման, ինչպէս նաեւ Լեռնային Ղարաբաղի հակամարտութեան առնչուող եւ անոնցմէ բխող բոլոր հարցերու կարգաւորման:
ԵԱՀԿ-ի մէջ ՀՀ մշտական ներկայացուցիչը վերահաստատած է Հայաստանի Հանրապետութեան յանձնառութիւնը` տարածաշրջանին մէջ խաղաղութեան եւ կայունութեան հաստատման օրակարգին: Ընդգծուած է ԵԱՀԿ Մինսքի խմբակի համանախագահութեան` որպէս միջազգայն մանտաթ ունեցող բանակցային ձեւաչափի, ջանքերուն կարեւորութիւնը:
