Նախկին նախագահ Պեշիր Ժեմայէլի նահատակութեան 40-րդ տարելիցի յիշատակի հանդիսութեան ընթացքին իր խօսած ճառին մէջ, Նատիմ Ժեմայէլ յայտարարեց, որ ընտրուելիք նախագահը պէտք է ըլլայ Լիբանանի արտադրութիւն, կամ ՙԼիբանանի համար նահատակութեան՚ դպրոցէն կամ ոչ մէկ նախագահ:
Ան հաստատեց, որ նախագահ Ժեմայէլի սպանութենէն ետք սուրիացին եւ իրանցին կրցան իրենց ծրագրած պետութիւնը հիմնել Լիբանանի մէջ եւ երկիրը հասցուցին այս ողորմելի վիճակին, Պեշիրի ծրագիրը փոխարինելով ձախողած ծրագիրով մը:
Ժեմայէլ աւելցուց, որ մեզ այս վիճակին հասցուցին, որովհետեւ մեր առջեւ դրին երկու տարբերակ` կայունութիւն կամ արժանապատուութիւն, ու մենք երկրին կայունութիւնը չխախտելու համար ընտրեցինք զայն ու հասանք այսօրուան վիճակին:
Պեշիր իր ընտրութենէն ետք 20 օրուան ընթացքին փշրեց բոլոր շղթաները եւ սկսաւ այցելել բոլորին ու երկիրը սկսաւ բռնել կայունութեան ճամբան, սակայն մութ ուժեր չձգեցին որ շարունակուի այս դրական ընթացքը եւ վերջ դրին անոր կեանքին ու ծրագիրին:
