Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնի մէջ ընդունեց Ռումանիոյ Հանրապետութեան արտաքին գործերու փոխնախարար Իւլիան Ֆոթայի գլախաւորած պատուիրակութիւնը:
Հանդիպման ընթացքին Վեհափառ Հայրապետը անդրադարձաւ Ատրպէյճանի` Հայաստանի հանդէպ սանձազերծած ռազմական գործողութիւններուն, որուն հետեւանքով կան զոհեր, վիրաւորներ եւ աւերածութիւններ: Այս առնչութեամբ Ամենայն Հայոց կաթողիկոսը յոյս յայտնեց, որ միջազգային հանրութիւնը միջոցներու պիտի ձեռնարկէ զսպելու Ատրպէյճանի յարձակումը` յանուն տարածաշրջանին մէջ խաղաղութեան հաստատման:
Փոխնախարար Իւլիան Ֆոթան իր ցաւակցութիւնը յայտնեց Ամենայն Հայոց կաթողիկոսին ատրպէյճանական յարձակման հետեւանքով զոհուած հայորդիներուն առիթով` վստահեցնելով, որ Ռումանիոյ կառավարութիւնը ամէն ջանք պիտի գործադրէ նպաստելու տարածաշրջանին մէջ կայունութեան եւ խաղաղութեան հաստատման: Իւլիան Ֆոթան յոյս յայտնեց, որ իր այցը Հայաստան պիտի նպաստէ երկու բարեկամ երկիրներու փոխյարաբերութիւններու աւելի խորացմանն ու սերտացման:
Փոխնախարարը Նորին Սրբութիւն Գարեգին Բ. Ամենայն Հայոց կաթողիկոսին փոխանցեց նաեւ Ռումին Ուղղափառ Եկեղեցւոյ Դանիէլ պատրիարքին ողջոյններն ու բարեմաղթանքները:
Զրոյցի ընթացքին անդրադարձ կատարուեցաւ երկու ժողովուրդներուն միջեւ առկայ դարաւոր ջերմ յարաբերութիւններուն, ինչպէս նաեւ ռումանահայ համայնքի ներգրաւուածութեան Ռումանիոյ կեանքի տարբեր ոլորտներուն մէջ եւ երկրի զարգացման գործընթացին: Հայոց Հովուապետը իր երախտագիտութիւնը յայտնեց Ռումանիոյ իշխանութիւններուն եւ Ռումին Ուղղափառ Եկեղեցւոյ ռումանահայ համայնքի եւ Ռումանիոյ հայոց թեմին նկատմամբ դրսեւորուող հոգատար վերաբերմունքին համար:
