Ըստ ռազմական վերլուծող Դաւիթ Ճամալեանի, Ատրպէյճանի լրատուական աղբիւրներ լուր կը տարածեն հայկական կողմի կատարած զինեալ խախտումներուն մասին: Այդ արարքը սկիզբն է նոր յարձակումի մը, որ կը պատրաստէ ատրպէյճանական կողմը: Այդ յարձակումը կը զսպեն Ռուսիան եւ Իրանը: Սակայն ատրպէյճանական կողմը առանձին չի գործեր, ան ունի իր տէրերը, որոնք անկլօ-սաքսոնական ուժերն են:
Վերլուծողը չի զարմանար, որ Ուքրանիոյ մէջ ամէն անգամ որ ռուսական կողմը կ’ուզեն նեղի դնել, Ատրպէյճան կը յայտարարէ, թէ պատրաստ է պատասխանելու հայկական կողմի կատարած խախտումներուն: Ուրեմն, ՆԱԹՕ-ի որեւէ յաջողութեան պարագային, Ատրպէյճան պիտի փորձէ նեղել Հայաստանը եւ պիտի փորձէ իր հակակշիռին տակ առնել Սիւնիքը: Ըստ Ճամալեանի, ռուսական կողմի որեւէ պարտութեան պարագային Ուքրանիոյ մէջ, Ատրպէյճան պիտի սկսի իր յարձակումը եւ դժբախտաբար, ըստ իրեն, հայկական կողմը որեւէ քայլ չ’առներ կանխելու համար այսպիսի վտանգաւոր կացութիւն մը:
Վերլուծող Ճամալեան յայտարարեց, որ, Ռուսիան զբաղած ըլլալով, հիմա է յարմար ժամանակը Հայաստանը հարուածելու: Այս բոլորին շորւջ համաձայն են Թուրքիա, Ատրպէյճան, Իսրայէլ եւ իրենց անկլօ-սաքսոն տէրերը: Վաղը կրնայ ուշ ըլլալ, երբ Ռուսիա վերագտնէ իր հաւասարակշռութիւնը:
