Լիբանանի խորհրդարանի նախագահ Նեպիհ Պըրրի Սուրի մէջ կազմակերպուած հանդէսի մը ընթացքին, շիի կրօնաւոր Մուսա Սատըրի անհետացման յիշատակին առիթով, արտասանեց ճառ մը, որուն մէջ անդրադարձաւ երկրին դիմագրաւած բոլոր այժմէական հարցերուն:
Նախագահի ընտրութեան մասին խօսելով, ան հաստատեց որ պիտի ընտրեն երկրին գերիշխանութիւնը յարգող ու միացնող անձնաւորութիւն մը: Ան Իսրայէլը կոչեց Լիբանանի գոյութենական սպառնալիք: Ան լիբանանեան բանակէն պահանջեց պողպատեայ ձեռքով հարուածել ապահովութեան սպառնացող բոլոր անձերը: Պըրրի նաեւ կառավարութենէն պահանջեց սկսիլ բանակցութիւն սուրիական իշխանութեան հետ, մանաւանդ սուրիացի գաղթականներու վերադարձի հարցով: Ան անօրինական կոչեց բոլոր այն քայլերը, որոնց նպատակն է երկիրը հասցնել քաղաքական դատարկութեան: Պըրիի այս ժամանակաշրջանը համարեց ամենավտանգաւորը Լիբանանի արդի պատմութեան մէջ, որովհետեւ հակառակ մեր ապրած անկումի վիճակին, տակաւին կան մարդիկ որոնք կը զբաղին զիրար հարուածելով եւ կը փորձեն դիրք շահիլ: Անոնք իրականութենէն հեռու ապրող մարդիկ են:
Խորհրդարանի նախագահը անպատասխանատու որակեց բոլոր այն կարծիքները, որոնք կը հաստատեն, թէ ելեկտրականութիւն չունինք, որովհետեւ չձգեցին որ աշխատինք: Սահմանագծումի հարցին անդրադառնալով, Պըրրի հաստատեց, որ ԱՄՆ-ի պատուիրակը երկու շաբաթ ժամանակ խնդրած էր Լիբանանի առաջարկին պատասխանելու համար, սակայն արդէն մէկ ամիս պիտի ըլլայ: Մենք պատրաստ ենք անուղղակի բանակցութեան, սակայն ոչ անորոշ երկարաձգումներով: Գնդակը ներկայիս ԱՄՆ-ի դաշտին մէջն է: Մենք պատերազմ ուզողներ չենք, սակայն արժանապատուութիւնը եւ իրաւունքը իրենց գինը ունին, որ պատրաստ ենք վճարելու:
