Հիւսիսի երեսփոխան Միշէլ Տուէյհի կատարեց յայտարարութիւն մը «Էմ.Թի.Վի.» պատկերասփիւռի կայանին ու ըսաւ, թէ լուծումը կը սկսի նախագահի ընտրութեամբ: Ան աւելցուց, թէ երկիրը կ’ուղղուի դէպի անօթութիւն, եթէ չառնենք պէտք եղած քայլերը:
Տուէյհի յայտարարեց, թէ պիտի առաջարկեն թեկնածուներու ցանկ մը եւ հիմնական նպատակը պիտի ըլլայ Լիբանանը դուրս հանել իրարու հակադրուող դաշինքներէն: Ըստ Տուէյհիի, իրենք պիտի բանակցին երեսփոխանական բոլոր խմբաւորումներուն հետ անխտիր ու պիտի ներկայացնեն իրենց առաջարկը: Ան աւելցուց, թէ պահանջուածը երկրին նախագահն է եւ ոչ թէ համայնքի մը նախագահը: Ըստ Տուէյհիի, մեզի պէտք է զօրաւոր պետութիւն, նախագահը պէտք է ըլլայ որոշում կայացնող քաղաքագէտ եւ ոչ թէ միջակ լուծումներու մարդ: Նախընտրելի է ոչ-զինուորական ըլլալը:
Տուէյհի ժխտական նկատեց նախագահ Աունի իշխանութեան ժամանակաշրջանը, երբ երկիրը սուղ գին վճարեց այդ քաղաքականութեան համար:
