Հինգշաբթի երեկոյեան տեղի ունեցան Եւրոպայի ֆութպոլի կիներու ակումբներու առաջնակարգ մրցաշարքի` Չեմփիընզ Լիկի զտումի կիսաւարտական հանգրուանի մրցումները: Ստորեւ տեսնել արձանգրուած արդիւնքները.
– Վալիւր Ռէյքիավիք (Իսլ.) – Հայասա (Հայ.) 2-0
– Փարիզ ՖՍ (Ֆր.) – Սերվէթ Շենուա (Զուից.) 3-0
– Այաքս (Հոլ.) – Քրիսթիանսթատ (Շուէտ) 3-1
– Ֆորթիւնա Հիէօրինկ (Դան.) – Այնթրախթ Ֆրանք. (Գեր.) 0-2
– Եուվենթիւս (Իտ.) – Ռասինկ (Լիւքս.) 4-0
– Կլասկօ Սիթի (Սկ.) – Ռոմա (Իտ.) 1-3
– Ռէալ Մատրիտ (Սպ.) – Շթուրմ Կրաց (Աւստ.) 6-0
– Մանչեսթըր Սիթի (Անգ.) – Թոմիրիս Թուրան (Ղազ.) 6-0
Այս հանգրուանի ամենամեծ անակնկալն էր Սկովտիայի զօրաւոր ՙԿլասկօ Սիթի՚ի պարտութիւնը Իտալիոյ ՙՌոմա՚ի դիմաց: Իսկ Հայաստանի կիներու ախոյեան ՙՀայասա՚ն դիւրին մրցակից չէր Իսլանտայի զօրաւոր կազմ Ռէյքիավիքի ՙՎալիւր՚ին դիմաց ու միայն զիջեցաւ երկու կոլի տարբերութեամբ: Հաւասարակշռուած մրցումին, իսլանտացիները կրցան կատարել 3 դիպուկ եւ 9 անկիւնային հարուած: ՙՀայասա՚ կատարեց մէկ դիպուկ հարուած: Ամերիկացի յարձակող Հինցըն` 14-րդ եւ փոխարինող վենեցուելլացի Սփեքմայըր տուգանայինով` 90-րդ վայրկեաններուն նշանակեցին կոլերը: ՙՀայասա՚ի մարզիչն է ուքրանացի Քոթիք: Խումբը կը բաղկանայ ղանացի, ուքրանացի, պրազիլցի, ղազախ եւ հայ մարզիկներէ: Յաղթող խումբերը պիտի մրցին իրարու դէմ որոշելու համար այն 15 խումբերը, որոնք պիտի մրցին Եւրոպայի առաջին 15 դասուած խումբերուն դէմ, մրցելու համար խմբակներու հանգրուանին: Պարտուող խումբերը պիտի մրցին 3-րդ դիրքը գրաւելու համար:
