Երուսաղէմի Սրբոց Յակոբեանց Մայր տաճարին մէջ 20 Օգոստոս 2022 թուականին պիտի կատարուի հոգեհանգստեան կարգ Երեւանի ՙՍուրմալու՚ առեւտուրի կեդրոնին մէջ տեղի ունեցած պայթումին հետեւանքով զոհուածներու հոգիներու խաղաղութեան եւ հանգիստին համար:
Երուսաղէմի հայոց պատրիարք Տ. Նուրհան Արք. Մանուկեանը ցաւակցական ուղերձ յղած է, որուն մէջ մասնաւորապէս ըսուած է.
ՙԵրուսաղէմի Սրբոց Յակոբեանց Միաբանութեան եւ Սուրբ Երկրի հայ համայնքին անունով ցաւակցութիւններ կը յայտնենք ՙՍուրմալու՚ առեւտուրի կեդրոնին մէջ տեղի ունեցած պայթումին հետեւանքով զոհուած մեր հայրենակիցներու հարազատներուն եւ կը հայցենք անոնց համար Սուրբ Հոգւոյն մխիթարութիւնը:
Միեւնոյն ժամանակ կ՛աղօթենք վիրաւորներու շուտափոյթ առողջութեան եւ ամբողջական ապաքինման համար:
Այսպիսի աղէտներու հետեւանքները յաղթահարելու համար պէտք է ազգային միասնականութիւն ցուցաբերել եւ կեդրոնացնել մեր ամբողջ ներուժը` խուսափելու ապագայի այսօրինակ պատահարներէ:
Թող Երկնաւոր Հայրը իր երկնքի արքայութեան արժանացնէ անոնց հոգիները՚:
