Ծննդաբաններ` ազգութեամբ ռուս Օքսանան եւ պելճիքացի Տենիսը 14 Օգոստոսին հանգստեան օր կ՛անցընէին Հայաստանի լեռներէն մէկուն վրայ, երբ իմացան ՙՍուրմալու՚ առեւտուրի կեդրոնին մէջ տեղի ունեցած պայթումին մասին: Ամուսնական զոյգը անմիջապէս շտապած է օգնութեան հասնելու հայ փրկարարներուն:
Օքսանայի ու Տենիսի հետ կապուած էին իրենց վաղեմի գործընկերները Հայաստանի փրկարար ծառայութենէն, որոնց հետ մասնակցած էին միջազգային վարժանքներու եւ սերտ համագործակցութիւն ունին: Տեղեկութիւն ստանալէ անմիջապէս յետոյ անոնք կ՛ուղեւորուին Երեւան, կը հանդերձաւորուին եւ ծննդաբանական շուներու` Շիւայի եւ Շաքթիի հետ կը ժամանեն ՙՍուրմալու՚ առեւտուրի կեդրոն:
ՙԱյդ ժամանակ Երեւանէն դուրս լեռներէն մէկուն վրայ կը զբօսնէինք, կը հանգստանայինք, բայց պայթումին մասին տեղեկութիւն ստանալէ անմիջապէս յետոյ վերադարձանք Երեւան: Մենք աղջիկ ունինք, չէինք գիտեր զայն որուն մօտ թողել, ինչ որ յաւելեալ խնդիրներ յառաջացուց, այդ իսկ պատճառով դէպքի վայր ժամանեցինք քիչ մը ուշ` 6 ժամ անց, բայց նոյնիսկ եթէ շուտ հասնէինք, ծննդաբանական ծառայութիւն հնարաւոր չէր ըլլար իրականացնել, որովհետեւ տակաւին կը շարունակուէին պայթումները, հրդեհը: Սկիզբը անհրաժեշտ է հաստատել նուազագոյն անվտանգ պայմաններ փրկարար ծառայութեան աշխատակիցներուն եւ շուներուն համար, որմէ յետոյ սկսիլ աշխատանքը: Բայց նոյնիսկ այդ բարդ պայմաններուն մէջ Հայաստանի փրկարար ծառայութեան աշխատակիցները գերազանց աշխատեցան եւ կրցան սկիզբէն փրկել մարդիկը՚, պատմած է Օքսանան:
Օքսանան եւ Տենիսը գերմանական ՙ@fire International Disaster Response Germany՚ կազմակերպութեան անդամներ են: Շուներուն վարժեցուցած են կազմակերպութեան ծրագրի շրջանակներուն մէջ: Աւելի քան 400 անդամ ունեցող կազմակերպութիւնը օգնութիւն կը ցուցաբերէ աղէտներու ժամանակ աշխարհի որեւէ տեղ:
ՙՄեր կազմակերպութիւնը օգնութեան կը հասնի անտառային հրդեհներու, պայթումներու, երկրաշարժներու ժամանակ: Ներկայիս մեր կազմակերպութեան անդամներուն մէկ մասը Գերմանիոյ մէջ կը պայքարի անտառային հրդեհներու դէմ: Մեր կազմակերպութիւնը օգնութիւն ցուցաբերած է 2020 թուականի Օգոստոսին Լիբանանի մէջ ուժգին պայթումին ժամանակ՚, ըսաւ Օքսանան:
Օքսանան կը նշէ, որ հայ փրկարարները շատ լաւ աշխատած են նման բարդ եւ քաոսային պայմաններու մէջ ու կրցած են կատարել իրենց խնդիրը:
ՙԳիտէք, որքան ժամանակը կ՛անցնի, այդքան կը նուազի փլատակներուն մէջ մարդոց ողջ մնալու հաւանականութիւնը, մանաւանդ հրդեհի ու ծուխի առկայութեան պարագային: Շատ դժուար պայմաններ էին: Գիտեմ, որ հասարակութեան մօտ հարցեր յառաջացած էին, թէ ինչու որոնողափրկարարական աշխատանքները արագ չեն ընթանար: Կրնամ ըսել հետեւեալը, որ աշխատանքները արագ չեն կրնար ընթանալ, այդ որոշակի ժամանակ կը պահանջէ: Շատ դժուար պայմաններ էին, եւ փրկարար ծառայողները գերազանց կատարեցին իրենց աշխատանքը: Սա մեր առաջին համագործակցութիւնը չէր Հայաստանի փրկարար ծառայութեան հետ, եւ մեր միասնական աշխատանքը հրաշալի էր՚, ըսաւ Օքսանան:
Օքսանան եւ Տենիսը գրեթէ մէկ տարի է կ՛ապրին Հայաստանի մէջ: Անոնց խօսքով` Հայաստանի մէջ մարդիկ բարի են:
ՙԱշխարհը շատ փոքր է: Հայաստանի փրկարարներուն հետ ես ծանօթացած եմ միջազգային վարժանքներու ժամանակ, եւ այնտեղէն մենք իրար կը ճաչնանք: Մենք իրար կ՛օգնենք, այդպէս եղած է եւ, կը կարծեմ, այդպէս պիտի ըլլայ՚, եզրափակեց Օքսանան:
