Լիբանանի Հանրապետութեան նախագահ Միշէլ Աուն քննադատեց բոլոր այն երկիրները, որոնք Լիբանանէն կը պահանջեն իր մօտ պահել սուրիացի գաղթականները եւ զանոնք մնայուն ձեւով բնակեցնել երկրին մէջ: Ան ոճիր համարեց այս հարցը եւ անընդունելի: Ան ապօրինի համարեց այս պահանջը, ըստ միջազգային եւ մարդասիրական օրէնքի:
Ան այս յայտարարութիւնը կատարեց Լիբանան այցելող` Գանատայի միջազգային զարգացումի նախարարին առջեւ: Նախագահը աւելցուց, որ Լիբանան կը պատրաստէ օրինական փաստաթուղթեր սուրիացի գաղթականներու հարցին վերաբերեալ եւ զայն պիտի բարձրացնէ Միացեալ ազգերու կազմակերպութեան: Աուն յստակօրէն յայտարարեց, որ Լիբանան այլեւս անկարող է մէկուկէս միլիոն սուրիացի գաղթականներու բեռը առանձին կրելու, մանաւանդ որ Սուրիոյ մէջ շատ մը շրջաններ, ուրկէ եկած են գաղթականները, ապահով են:
