ՙԶուարթնոց՚ օդակայանին մէջ երկրպագուները դիմաւորեցին 44-րդ Համաշխարհային Ողիմպիականին արծաթէ մետալ նուաճած Հայաստանի ճատրակի տղամարդոց հաւաքականը:
ՙՍա վերջին տարիներու հայկական մարմնամարզի ամենավառ անակնկալն էր՚, ըսաւ ՀՀ ԿԳՄՄ նախարարի տեղակալ Կարէն Գիլոյեանը` խօսելով ճատրակի հաւաքականին հետ կապուած ակնկալիքներէն:
Կարէն Գիլոյեանի խօսքով` եթէ տղաները մտնէին հնգեակ, արդէն իսկ շատ լաւ արդիւնք պիտի ըլլար. ՙԲայց տղաները ապացուցեցան, որ խմբակին մէջ կարեւոր չէ վառ աստղի առկայութիւնը: Խմբակը յաջողութեան կը հասնի, երբ օրկանապէս կը զգան իրար: Վերջին փուլը ուղակի ամենագեղեցիկ ու վառ ապացոյցն էր, թէ խմբակը ինչպէս պէտք է խաղայ, երբ տեսան Գաբրիէլ Սարգսեանը առաւելութիւն ունի, բոլորը սկսան հաւասարութեամբ խաղալ` մեզի յաղթանակ պէտք էր՚, ըսաւ Գիլոյեանը:
Ան ընդգծեց, որ չնայած այն փաստին, որ Հայաստանը երեք անգամ Ողիմպիականի ախոյեան խմբակ ունեցած է, երկարատեւ դադարէ յետոյ սա կը համարէ պատմական յաջողութիւն:
Հայաստանի ճատրակի տղամարդոց խմբակի գլխաւոր մարզիչ Արման Փաշիկեան նշեց, որ խմբակը միանշանակ շատ լաւ մասնակցութիւն ցուցաբերեց: Անդրադառնալով Ատրպէյճանի հետ խաղին` Փաշիկեան նշեց, որ, բնականաբար, հոգեբանօրէն լարուածութիւնը փոքր աւելի շատ էր, բայց սկզբնախաղերէն յետոյ, դիրքերը շատ բարենպաստ էին, եւ մրցաշարքի առաջին վայրկեաններու ընթացքին արդէն պարզ էր, որ պիտի յաղթեն:
Հայաստանի ճատրակի հաւաքականի աւագ Գաբրիէլ Սարգսեանը, անդրադառնալով հաւաքականի նախկին աւագ Լեւոն Արոնեանի բացակայութեան, ըսաւ. ՙԱնգամ այս մեր յաղթանակի մէջ մեծ ներդրում ունի Լեւոն Արոնեանը: Ի հարկէ, մեծ կորուստ է մեզի համար, որ Լեւոնը չկայ, բայց անգամ այս մեր յաղթանակի մէջ նա մեծ ներդրում ունի: Բնականաբար, իր բացակայութիւնը կը զգացուի, ու յատկապէս կը զգացուէր մրցաշարքին պատրաստուելու ժամանակ՚:
