Հիւլէական ուժանիւթի միջազգային կազմակերպութիւնը յայտարարեց, որ ըստ Ուքրանիայէն ստացած տեղեկագիրին, որեւէ վտանգ չկայ Զապորոժիէի հիւլէակայանին մէջ: Սակայն քննիչներու խումբ մը պէտք է ուղղուի այդտեղ ամենամօտ առիթով: Հարկ է նշել, որ Զապորոժիէի հիւլէակայանը կը համարուի ամենամեծը Եւրոպայի մէջ եւ ան Մարտ ամիսէն ի վեր կը գտնուի ռուսական բանակի ազդեցութեան տակ: Վերջին օրերուն, Ուքրանիա եւ Ռուսիա ամբաստանութիւն փոխանակած էին հիւլէակայանը ռմբակոծելու եւ զայն վտանգի ենթարկելու մէջ:
Միւս կողմէ, ճարտարարուեստի եօթը զարգացած երկիրները Ռուսիայէն պահանջեցին անյապաղ քաշուիլ հիւլէակայանէն, զայն ամբաստանելով որպէս հիւլէակայանին վնասող կողմ: Անոնք աւելցուցին, որ ռուսական ուժերու գոյութիւնը հիւլէակայանին մէջ կ’աւելցնէ աղէտ մը պատահելու հաւանականութիւնը:
