Եղիշէ Չարենցի տուն-թանգարանի հաւաքածուն համալրուեցաւ հեղինակին դիմանկարով, որ կը պատկանի Հայաստանի ժողովրդական նկարիչ Հրաչեայ Ռուխկեանի վրձինին:
Կտաւը երկար տարիներ պահուած է մասնաւոր հաւաքածուներու մէջ եւ հանուած է վաճառքի: Զայն ձեռք բերած է փեթերսպուրկաբնակ բարերար Հրաչեայ Պօղոսեանը: Ան 5 Օգոստոսին կտաւը նուիրեց տուն-թանգարանին` նշանաւորելով Եղիշէ Չարենցի 125-ամեակը:
Մինչ տուն-թանգարան երթալը միջոցառման հիւրերը, խումբ մը զինուորականներ ծաղիկներ խոնարհեցին մեծանուն գրողի յուշարձանին մօտ:
Հրաչեայ Պօղոսեանը պատմեց, որ կտաւը գնելուն պէս որոշած է զայն նուիրել տուն-թանգարանին, որպէսզի հանրութեան լայն շրջանակը զայն տեսնելու հնարաւորութիւն ունենայ: ՙՇատ կը փափաքէի Չարենցի յոբելեանի շրջանակին մէջ գրողին նուիրուած որեւէ միջոցառում նախաձեռնել: Որոշեցինք յուշարձանին մօտ ծաղիկներ խոնարհել, իսկ տուն-թանգարանին մէջ հիւրերը կրնան վայելել այն ուտեստները, որոնք սիրած է Չարենցը: Ան շատ սիրած է չիրեղէն, պասթուրմա, սուճուխ, հայկական կոնեաք ու միրգեր՚, ըսաւ Պօղոսեանը` ընդգծելով, որ երբեմն կը վերընթերցէ Չարենցի ստեղծագործութիւնները եւ շնորհակալ է իր բոլոր ուսուցիչներուն, որոնց շնորհիւ մեծ սէր կը տածէ գրողին նկատմամբ:
Չարենցի տուն-թանգարանի տնօրէն Ժաննա Մանուկեան յիշեցուց, որ թանգարանները իրենց հաւաքածուները կը համալրեն գնումներու, փոխանակումներու, նուիրատուութիւններու եւ այլ եղանակներով, իսկ նուիրատուները առանձնայատուկ կարեւորութիւն ունին տուն-թանգարանի հաւաքածուն հարստացնելու գործին մէջ:
ՙՀաւաքածուն ունի տարբեր բաժիններ, որոնց մէջ իւրայատուկ տեղ կը զբաղեցնեն կերպարուեստի նմուշները. կը պահուին տասնեակ գեղանկարչական աշխատանքներ, կրաֆիքական գործեր: Կան Մարտիրոս Սարեանի, Հենրիկ Սիրաւեանի, Արա Պեքարեանի աշխատանքները` նուիրուած Չարենցին: Վերջերս Նարեկ Վան Աշուղաթոյեանը թանգարանին նուիրեց իր մեծ հօր` ՀԽՍՀ վաստակաւոր նկարիչ Յովհաննէս Շարամպէյեանի կրաֆիքական աշխատանքը: Չարենցեան տարին հարուստ է նուէրներով, իսկ Ռուխկեանի կտաւը, որ կը նուիրէ Հրաչեայ Պօղոսեանը, մեծ ոգեւորութեամբ ընդունած ենք: Այն տեղ պիտի գտնէ մեր հաւաքածուին մէջ՚, շեշտեց Մանուկեանը:
Չարենցի թոռնուհի Գոհար Չարենցի խօսքով` բանաստեղծին դիմանկարը մեծ նուէր է տուն-թանգարանին համար: ՙՌուխկեանը մեր ժամանակներու հրաշալի նկարիչներէն մէկն է: Ան մէկ անգամ չէ, որ նկարած է Չարենցին: Անոր ստեղծագործութիւններէն մէկը տուն-թանգարանի հաւաքածուին մէջ է, սակայն այս կտաւը իմ վրայ մեծ տպաւորութիւն թողուց: Նկարին էմջ Չարենցը մտահոգ է, շատ կոկիկ՚, ըսաւ ան` շեշտելով, որ Հրաչեայ Պօղոսեանը բացառիկ անձնաւորութիւն է ու իսկական բարերար, քանի որ շատ օգած է իր կարիքը ունեցող բազմաթիւ մարդոց, յուշարձաններ բացած է, եւ ուրախ են, որ կտաւը գնած ու նուիրած է տուն-թանգարանին:
Գոհար Չարենցը կարեւորեց տուն-թանգարանը նոր ցուցանմուշներով համալրելը եւ յորդորեց Չարենցի հետ առնչուող նիւթերը նուիրել տուն-թանգարանին:
