11-13 Նոյեմբեր 2022 թուականին Երեւանի մէջ տեղի պիտի ունենայ ՙԱպագայ Հայկականը՚ հիմնադրամի առաջին համաժողովը` ՙՔաղաքացիական վեհաժողով՚ մասնակցային ժողովրդավարութեան ձեւաչափի հիման վրայ:
Համաժողովի ընթացքին Հայաստանի Հանրապետութենէն, Արցախէն եւ Սփիւռքէն ընտրուած 200 մասնակից պիտի քննարկէ ՙԱպագայ հայկականը՚ հանրային նախաձեռնութեան 15 նպատակներէն երեքը` ՙՀայաստան-Սփիւռք միասնականութիւն՚, ՙՊատմական պատասխանատուութիւն՚ եւ ՙԲնակչութեան աճ՚` վեր հանելու առկայ խնդիրները, մարտահրաւէրները եւ ընդունելու անոնց լուծման ուղղուած առաջարկութիւններու փաթեթներ:
ՙԳիտակցելով մեր հաւաքական պատասխանատուութեան հայ ժողովուրդի կայուն ու անվտանգ ապագայի կերտման եւ մեր զարգացման ուղին կանխորոշելու գործին մէջ` մեզմէ իւրաքանչիւրը կրնայ դառնալ այս կարեւոր գործընթացի մաս՚, նշուած է հիմնադրամի տարածած հաղորդագրութեան մէջ:
Մասնակցութեան յայտ ներկայացնելու համար անհրաժեշտ է ՙԱպագայ հայկականը՚ նախաձեռնութեան պաշտօնական կայքէջին մէջ լրացնել համապատասխան յայտաձեւը:
