Իսրայէլեան լրատուական աղբիւրներ յայտարարեցին, որ երեք օր առաջ սկսած Կազայի յարձակումէն ի վեր 950 հրթիռ արձակուած է Կազայէն դէպի իսրայէլեան թիրախներ: Ըստ նոյն աղբիւրին, Իսրայէլի հարաւային մասը թիրախ դարձած է այդ հրթիռներու մեծամասնութեան:
Արաբական լիկան դատապարտեց իսրայէլացի գաղութարարներու մուտքը Երուսաղէմի Աքսա մզկիթը ու այս քայլը համարեց ոտնակոխում սրբութիւններու եւ Իսրայէլի կառավարութիւնը պատասխանատու նկատեց այս քայլին համար, որ թոյլ կու տայ ծայրայեղականներու մտնել իսլամներու մզկիթը: Ան նկատի առաւ նաեւ, որ այս ոտնակոխումը տեղի կ’ունենայ Կազայի վրայ կատարուած յարձակումին զուգահեռ:
Երէկ առաւօտ խումբ մը իսրայէլացի գաղութարարներ մտած էին Աքսա մզկիթ, իսրայէլեան ուժերու պաշտպանութեան տակ:
Իսրայէլի վարչապետ Եայիր Լափիտ յայտարարեց, որ իրենց դրած նպատակները իրագործեցին Կազայի մէջ եւ առճակատումը պէտք է դադրի: Եգիպտոսի բանագնացը, որ կը բանակցի Իսրայէլի եւ պաղեստինցիներու հետ, յայտարարեց, որ զինադադարը մօտալուտ է: Իսրայէլ ընդունած է կարգ մը պաղեստինեան պայմաններ` Եգիպտոս պիտի հետեւի ձերբակալուած պաղեստինցիներու խնդիրին, նաեւ Իսրայէլ պիտի թուլցնէ շրջափակումը եւ թոյլ պիտի տայ վառելանիւթի մուտքը Կազա:
Ըստ պաղեստինեան աղբիւրներու, ցարդ Կազայի մէջ ինկած են 41 զոհեր, որոնց 15-ը երեխաներ ու կան 311 վիրաւորներ:
