Անթարքթիքայի արեւելեան ափին մօտ ջուրի ջերմաստիճանը 20-րդ դարի առաջին կէսի հաեմատութեամբ 2-3 աստիճանով բարձրացած է` ովկիանոսային հոսանքներու փոխուած ւղղութիւններուն պատճառով: Այդ մասին կը հաղորդուի Աւստրալիոյ գիտական եւ կիրառական հետազօտութիւններու միաւորման (CSIRO) եւ Բրիտանիոյ Սաութհեմփթընի համալսարանի զեկոյցին մէջ, որ հրապարակուած է 3 Օգոստոսն:
Ջրային զանգուածները սկսած են տեղափոխուել ուրիշ երթուղիներով Հարաւային ովկիանոսին մէջ արեւմտեան քամիներու պատճառով, որոնք նոյնպէս սկսած են փչել նոր ուղղութիւններէ: Տասնեակ տարիներու ընթացքին այդ գործընթացը հարաւային բեւեռի կողմը տեղաշարժած է Անթարքթիքական շրջաբեւեռային հոսանքը, որ աստիճանաբար կը տաքցնէ Աւրորայի ենթասառցադաշտային աւազնի աւելի պաղ ջուրը:
ՙԼիովին հալելով` սառցադաշտերը այդ աւազանի շրջանին մէջ կրնան բարձրացնել ծովի մակարդակը 5,1 մեթրով՚, նախազգուշացուցած է հետազօտութեան հեղինակներէն մէկը` Լորա Էրաիս Պորեկերօն:
Վերջին տարիներուն Անթարքթիքան տարեկան կը կորսնցնէ 155 միլիառ թոն սառոյց, ինչ որ աշխարհի մնացեալ սառցադաշտերու հալելուն հետ մէկտեղ համաշխարհային ովկիանոսի մակարդակը տարեկան կը բարձրացնէ 3,6 միլիմեթրով:
Աւրորայի ենթասառցադաշտաին աւազանը կը գտնուի Անթարքթիքայի սառցային վահանի տակ: Այն յայտնաբերուած Է 1960-ական, 1970-ական թուականներուն եւ անուանուած է մայր ցամաքի հետազօտող Տուկլաս Մոուսոնի (1882-1958) նաւի պատուին: Անթարքթիքական շրջաբեւեռային հոսանքը 30 հազար քիլոմեթր երկարութեամբ եւ 2,5 հազար քիլոմեթր լայնութեամբ արեւմուտքէն դէպի արեւելք կը գօտեւորէ Երկրագունդը:
