Արցախի Հանրապետութեան ներքին անվտանգութիւնն ու հանրային կեանքի բնականոն ընթացքը աւելորդ ցնցումներէ զերծ պահելու համար կը խնդրենք ձեռնպահ մնալ շփման գիծին վրայ առկայ իրադրութեան շուրջ իրականութեա չհամապատասխանող կամ չստուգուած տեղեկութիւններ տարածելէ: Այս մասին հաղորդագրութիւն տարածած է Արցախի Դատախազութիւնը:
ՙ2022 թուականի Օգոստոս 1-էն Արցախի Հանրապետութեան հիւսիսային եւ հիւսիսարեւմտեան հատուածներուն մէջ Ատրպէյճանի զինուած ուժերուն կողմէ նախաձեռնուող ու իրականացուող սադրիչ գործողութիւնները Արցախի Հանրապետութեան կողմէ արդէն քանիերորդ անգամ բարձրաձայնուած` հայատեաց քաղաքականութեան ու Արցախը հայաթափելու ռազմավարութեան ռազմավարական քայլերու մասն են: Արցախի պաշտպանութեան բանակը արդէն ներկայացուցած է իրավիճակը շփման գիծին վրայ եւ պարբերաբար կը տրամադրէ տեղեկատուութիւն:
Թէեւ բազմիցս խօսուած է այդպիսի իրավիճակներու մէջ բացառապէս պաշտօնական աղբիւրներուն հետեւելու անհրաժեշտութեան մասին, այդուհանդերձ, նմանօրինակ պարագաներու մշտապէս ականատես կ՛ըլլանք ինքնագործունէութեան եւ անհարկի խուճապ ծնող երեւոյթներու: Արցախի մէջ հանրային կեանքը լարուածութեան մթնոլորտի մէջ կ՛անցնի գրեթէ ամէն օր, պետական մարմինները այդ պայմաններուն մէջ կը փորձեն կազմակերպել առողջապահութիւն, կրթութիւն, ընկերային ապահովութիւն, քաղաքաշինական աշխատանքներ, մինչդեռ լարուածութեան աւելորդ բաժինը ոչ միայն կաթուածահար կ՛ընէ նշուած գործընթացը, այլեւ յիշեալ համակարգերուն առջեւ արհեստականօրէն կը ծնի յաւելեալ ծանրաբեռնուածութիւն, որպիսի հետեւանք արձանագրուած է նաեւ վերջին օրերուն: Ուստի Արցախի Հանրապետութեան ներքին անվտանգութիւնն ու հանրային կեանքի բնականոն ընթացքը աւելորդ ցնցումներէ զերծ պահելու համար կը խնդրենք ձեռնպահ մնալ շփման գիծին վրայ առկայ իրադրութեան շուրջ իրականութեան չհամապատասխանող կամ չստուգուած տեղեկութիւններ տարածելէ՚, նշուած է հաղորդագրութեան մէջ:
