Թայուանի Պաշտպանութեան նախարարութեան բանբերը յայտարարեց, որ երէկ 21 չինական պատերազմական օդանաւեր խախտած են Թայուանի օդային սահմանը: Չինաստան սպառնացած էր սահմանափակ զինուորական գործողութիւններ կատարել որպէս հակադարձութիւն ԱՄՆ-ի Ներկայացուցիչներու պալատի նախագահ Նենսի Փելոսիի կղզի կատարած այցելութեան: Ըստ Չինաստանի Պաշտպանութեան նախարարութեան աղբիւրին, այս գործողութիւններուն նպատակը պիտի ըլլայ ապացուցել, որ Թայուան Չինաստանի մէկ մասն է եւ արտօնելի չէ երկրին գերիշխանութեան խախտումը:
Միւս կողմէ, Ռուսիոյ Դաշնութեան Արտաքին գործերու նախարարութիւնը իր նեցուկը յայտնեց Չինաստանին եւ յայտարարեց, որ Փելոսիի այցելութիւնը Թայուան կը համարուի ոտնձգութիւն Չինաստանի գերիշխանութեան եւ երկիրը իրաւունք ունի իր գերիշխանութիւնը պաշտպանելու:
