Լիբանանի խորհրդարանի փոխնախագահ Էլիաս Պու Սաապ յայտարարեց« որ Իսրայէլ ճնշած էր ֆրանսական ՙԹոթալ՚ ընկերութեան վրայ որպէսզի պեղում չկատարէ հարաւային ծովային սահմանին մօտ թիւ 9 դաշտին մէջ: Ան աւելցուց, որ իրենց բանակցային պայմաններէն մէկն էր թոյլ տալ ֆրանսական ընկերութեան, որ պեղումները սկսի: Պու Սաապ աւելցուց, որ Լիբանան պիտի չընդունի որեւէ խախտում իր ծովային սահմանին: Ըստ իրեն, Կանայի դաշտը ամբողջութեամբ կ’իյնայ Լիբանանի սահմանէն ներս:
Ամիսներ առաջ, ԱՄՆ-ի յատուկ բանագնաց Ամոս Հոքշթայն առաջարկած էր թիւ 9 դաշտը ամբողջութեամբ յանձնել Լիբանանին, փոխարէնը թիւ 8 դաշտը բաժնեկցիլ Լիբանանի եւ Իսրայէլի միջեւ: Լիբանան մերժած էր այս առաջարկը: Ըսկ քարիւղի մասնագէտ Լոռի Հայթայեանի, այս հարցը կարեւոր էր Իսրայէլի համար« որովհետեւ թիւ 8 դաշտէն պիտի անցնէր Իսրայէլէն Թուրքիա հասնող խողովակը: Ներկայիս այդ ծրագիրը փոխարինուեցաւ կազը ուղղելով Եգիպտոս եւ այդտեղ հեղուկի վերածելով կազատար նաւերու միջոցաւ փոխադրելով Եւրոպա:
Ըստ բանակցութեան վերջին տուեալներուն, Հոքշթայն Լիբանանի պատասխանատուներուն տեղեկացուց, որ Իսրայէլ Կանայի դաշտը ամբողջութեամբ պիտի յանձնէ Լիբանանին, փոխարէնը կ’առաջարկէ թիւ 23 սահմանը նշանակել որպէս սահման որոշ բացառութիւններով: Այս բացառութիւնները մերժուած են Լիբանանի կողմէ: Այս հարցին վերջնական լուծում գտնելու համար, Հոքշթայն ուղղուեցաւ Իսրայէլ, Լիբանանի վերջնական պայմանները փոխանցելու համար երկրի պատասխանատուներուն: Այս հարցը կը մնայ եւ ժխտական պատասխանի պարագային, ապագան կրնայ ականտես դառնալ անակնկալներու, եթէ Իսրայէլ Սեպտեմբերին պիտի սկսի արդիւնահանել Քարիշի դաշտէն եւ համաձայնութեան չհասնի Լիբանանի հետ: