ՀԱՅԱՍՏԱՆԸ ԱՐՑԱԽԻՆ ԿԱՊՈՂ ՆՈՐ ՃԱՆԱՊԱՐՀԻ ՇԻՆԱՐԱՐՈՒԹԻՒՆԸ ՊԻՏԻ ՍԿՍԻ ՕԳՈՍՏՈՍԻՆ
Հայաստանը Արցախին կապող նոր` Լաչինի միջանցքը փոխարինող ճանապարհի շինարարութիւնը պիտի սկսի Օգոստոսին, յայտարարած է Տարածքային Կառավարման Նախարարութիւնը:
Նոր ճանապարհը Սիւնիքի Տեղ, Կոռնիձոր գիւղերով պիտի մտնէ Արցախ` Բերդաձորի ենթաշրջանի Հին Շէն, Մեծ Շէն գիւղերով:
Ատրպէյճանական կողմն արդէն աւարտին կը հասցնէ գործը. Բերդաձորի գիւղերուն մէջ թուրք ու ատրպէյճանցի շինարարները կ’ասֆալթապատեն ճանապարհը: Կոռնիձորի տակ արդէն աւարտած են կամուրջի շինարարութիւնը:
Հայկական կողմը պէտք է կառուցէ Կոռնիձորէն Տեղ գիւղ տանող հատուածը: Գիւղին մէջ առայժմ շինարարներ չեն տեսած:
ՙՄեր կողմէ որեւէ աշխատանք չէ կատարուած, Ատրպէյճանի կողմէ կատարուած է զուտ իրենց մասով` դէպի իրենց ճանապարհը, եւ կամուրջը սարքած են: Իսկ մեր կողմը որեւէ աշխատանք դեռ չէ իրականացուած« չափագրողներ եկած են, չափագրումներ կատարած են այն տարածքով, որ պիտի անցնի, ըսաւ Կոռնիձորի համայնքապետարանի ներկայացուցիչ Լուսինէ Քարամեանը:
Ան ըսաւ, որ շաբաթներ առաջ գիւղին յարակից տարածքին մէջ մասնագէտները հետազօտական աշխատանք կատարած են:
Կառավարութիւնը Յունիս ամսուան վերջին նիստին ընդունած է որոշում մը« որով գումար յատկացուած է շարք մը ճանապարհներու կէոտեզիական (Geodesy), քարտէզագրական աշխատանքներու համար, այս շարքին է ՙՄ-12՚ Կոռնիձոր-Արցախ մայրուղիի վերակառուցումը:
ՙՄեզի հասած տուեալներով` ճանապարհը երեւի կ’անցնի դաշտամիջեան ճանապարհով, այսինքն` Կոռնիձորի յարակից դաշտավայրերով՚, ըսաւ Լուսինէ Քարամեանը:
Եռակողմ յայտարարութեամբ երեք տարուան ընթացքին Լաչինի միջանցքի երկայնքով նոր երթուղիի կառուցման նախագիծ պիտի հաստատուի: Երեք տարին չանցած ոչ թէ նախագիծի, այլ շինարարութեան աւարտի մասին կ’ազդարարէ Ատրպէյճանը: Հայկական կողմը նոր-նոր կը սկսի շինարարութիւնը:
Եռակողմ յայտարարութենէն մէկ ամիս ալ չանցած Ատրպէյճանի նախագահը արդէն կը յայտարարէր, որ պիտի կառուցեն Լաչինի միջանցքին փոխարինող ճանապարհը 3 տարիէն ալ շուտ:
ՙՆոր միջանցքի յարաչափերը յստակացնելէ յետոյ, Լաչին քաղաքը նոյնպէս պիտի վերադարձուի մեզի՚, կ’ըսէր Իլհամ Ալիեւ:
Հայասատան-Արցախ նոր երթուղիի երկայնքով նոյնպէս ռուս խաղաղապահներ պիտի տեղակայուին, սա նախատեսուած է եռակողմ յայտարարութեամբ:
